काठमाडौं । देशभर देखिएको ग्यास अभावका बीच नेपाल आयल निगमले सुरु गरेको आधा सिलिन्डर वितरण व्यवस्थाले उपभोक्तामा केही राहतको अनुभूति गराएको छ।
मंगलबार काठमाडौंको टेकुस्थित निगमको कार्यालयमा ग्यास लिन पुगेका सर्वसाधारणले पूर्ण सिलिन्डर नपाए पनि आधा परिमाणले दैनिक आवश्यकता पूरा गर्न सहज भएको बताएका छन्। लामो समयदेखि ग्यास अभाव झेलिरहेका उपभोक्ताका लागि यो उपाय अस्थायी समाधान बनेको देखिएको छ।
बजारमा ग्यासको चरम अभाव भएपछि निगमले ९ सय ५५ रुपैयाँमा आधा सिलिन्डर उपलब्ध गराउने व्यवस्था लागू गरेको हो। यसअघि डिपोहरूमा हप्तौँसम्म नाम दर्ता गर्दा पनि पालो नपाउने समस्या झेलिरहेका उपभोक्ता अहिले सिधै टेकु पुगेर ग्यास लिइरहेका छन्।
कलङ्कीबाट ग्यास लिन आएकी एक महिलाले १० दिनसम्म डिपो धाउँदा पनि ग्यास नपाएपछि अन्ततः यहाँ आएर आधा सिलिन्डर पाएको अनुभव सुनाइन्। उनका अनुसार यसले केही दिनका लागि भए पनि घरको चुल्हो बल्ने अवस्था बनेको छ।
अरू उपभोक्ताहरूले समेत ग्यास अभावका कारण दैनिक जीवन कष्टकर बनेको गुनासो गरेका छन्। कतिपय परिवारले खाना पकाउनै नसक्ने अवस्था भोग्नुपरेको भन्दै उनीहरूले यस्तो अवस्थामा आधा सिलिन्डर वितरणले राहत दिएको बताएका छन्।
यता, निगमले भने सबै उपभोक्तालाई सकेसम्म खाली हात फर्किन नपर्ने गरी वितरण व्यवस्थापन गरिएको जनाएको छ। निगमका प्रतिनिधिका अनुसार बजारमा देखिएको चाप कम गर्न र सीमित आपूर्ति सबैमा बाँडफाँड गर्न आधा सिलिन्डर वितरणको अवधारणा लागू गरिएको हो।
