काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेसँग जोडिएको मुद्दा फिर्ता गर्ने निर्णयको विषय फेरि सर्वोच्च अदालतमा प्रवेश गरेको छ। सोमबार पनि उक्त विषयमा निरन्तर सुनुवाइ हुदैछ ।
आइतबार महान्यायाधिवक्ताको कार्यालयले सर्वोच्च अदालतको निर्देशनअनुसार निर्णय संशोधनसम्बन्धी फाइल अदालतमा बुझाएको थियो। सोही फाइलमाथि आज विस्तृत बहस भइरहेको छ। न्यायाधीशद्वय सारंगा सुवेदी र सुनिलकुमार पोखरेलको संयुक्त इजलासमा यो मुद्दा विचाराधीन छ।
यसअघि पुस ३० गते महान्यायाधिवक्ता सविता भण्डारी बरालले लामिछानेविरुद्ध दर्ता भएका संगठित अपराध र सम्पत्ति शुद्धीकरणसम्बन्धी मुद्दा फिर्ता लिने निर्णय गरेकी थिइन्। सो निर्णय विवादित बनेपछि सर्वोच्च अदालतमा रिट दायर गरिएको थियो।
पछि उनले आफ्नो निर्णयमा संशोधन गर्दै सहकारी ठगीबाहेक अन्य अभियोगहरू फिर्ता लिने प्रक्रिया अघि बढाइन्। सुरुमा लामिछानेको हकमा मात्र संशोधन गर्ने निर्णयले थप विवाद जन्माएको थियो। त्यसपछि माघ २ गते उनले सबै आरोपितहरूको हकमा समान रूपमा आरोपपत्र संशोधन गर्ने निर्णय गरिन्।
हाल यो सम्पूर्ण प्रक्रियाको वैधानिकता र निर्णयको उचिततामाथि सर्वोच्च अदालतमा गहन बहस भइरहेको छ।
