काठमाडौं । प्रधानमन्त्री सुशीला कार्कीले पदबाट बिदा हुनुअघि राष्ट्रका नाममा सम्बोधन गर्दै आफ्नो कार्यकालबारे स्पष्ट धारणा राखेकी छन्। उनले आफूहरूले कुनै पनि काम गलत नियतका साथ नगरेको उल्लेख गरिन्।
बालुवाटारबाट बिहीबार साँझ गरिएको सम्बोधनमा उनले काम गर्ने क्रममा केही कमजोरी हुन सक्ने स्वीकार गर्दै त्यसको सम्पूर्ण जिम्मेवारी आफूले लिन तयार रहेको बताइन्।
“हामीले गलत मनसाय राखेर काम गरेका छैनौं, तर कामको क्रममा कतै त्रुटि भएको भए त्यसको जिम्मा मलाई नै दिनुहोला,” उनले भनिन्।
प्रधानमन्त्री कार्कीले हालै सम्पन्न प्रतिनिधिसभा निर्वाचनमार्फत जनताले परिवर्तनको पक्षमा स्पष्ट सन्देश दिएको पनि उल्लेख गरिन्।
