काठमाडौं । राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाह (बालेन) शुक्रबार प्रधानमन्त्रीको जिम्मेवारी सम्हाल्दैछन्। पार्टीको संसदीय दलको बैठकले उनलाई दलको नेताका रूपमा चयन गरिसकेको छ, जससँगै उनी सरकारको नेतृत्व गर्न तयार भएका छन्।
शपथ ग्रहणपछि बालेनले पहिलो मन्त्रिपरिषद् बैठकमै महत्वपूर्ण निर्णयहरू सार्वजनिक गर्ने तयारी गरेका छन्। उनले सरकार सञ्चालनको सुरुआतमै सुधारमुखी कदम चाल्ने संकेत दिएका छन्।
यसअघि नै उनले सबै मन्त्रालयसँग समन्वय गर्दै सुधारका योजना संकलन गर्न थालेका थिए। स्रोतका अनुसार मुख्य सचिव सुमनराज अर्यालमार्फत प्रत्येक मन्त्रालयलाई कम्तीमा पाँच–पाँच वटा सुधारका प्रस्ताव पठाउन निर्देशन दिइएको थियो।
हालै सम्पन्न प्रतिनिधिसभा निर्वाचनमा रास्वपाले झन्डै दुई तिहाइ सिट जित्दै सशक्त जनादेश पाएको छ। यही आधारमा बालेनले सरकारको सुरुवातदेखि नै प्रभावकारी काम गरेर परिणाम देखाउने तयारी गरिरहेका छन्।
