काठमाडौं । पर्यटकीय सहर पोखरा लेकसाइडमा रातको समयमा पर्यटकलाई हैरानी दिने गतिविधिमा संलग्न रहेको आरोपमा प्रहरीले १६ जना महिलालाई पक्राउ गरेको छ।
नेपाल प्रहरी अन्तर्गत जिल्ला प्रहरी कार्यालय कास्की र वडा प्रहरी कार्यालय बैदाम बाट खटिएको संयुक्त टोलीले आइतबार मध्यरात लेकसाइड क्षेत्रमा विशेष अपरेसन सञ्चालन गरेको हो।
राति करिब १२:३० बजेदेखि २ बजेसम्म चलेको उक्त अभियानका क्रममा पोखरा महानगरपालिका–६ का विभिन्न स्थानबाट उनीहरूलाई नियन्त्रणमा लिइएको प्रहरीले जनाएको छ।
प्रहरीका अनुसार पक्राउ परेकामाथि प्रारम्भिक अनुसन्धानमा पर्यटकलाई विभिन्न प्रलोभन देखाएर अनावश्यक झमेलामा पार्ने, बाटोमा रोक्ने तथा केही अवस्थामा लुटपाटसम्मका गतिविधि गर्ने गरेको आरोप छ।
स्थानीय तथा पर्यटकबाट लगातार गुनासो आउन थालेपछि सुरक्षा व्यवस्था कडा पार्दै अभियान सञ्चालन गरिएको प्रहरीले जनाएको छ।
पक्राउ परेका सबै १६ जनालाई नियन्त्रणमा राखेर थप अनुसन्धान तथा कानुनी प्रक्रिया अघि बढाइएको छ। प्रहरीले पर्यटकीय क्षेत्रमा शान्ति–सुरक्षा कायम राख्न यस्ता अभियान निरन्तर चलाइने जनाएको छ।
