काठमाडौँ । ह्वाइट हाउसका पत्रकारहरूसँग आयोजित रात्रिभोज कार्यक्रममा गोली चलेपछि अमेरिकी राष्ट्रपति डोनाल्ड ट्रम्पले सुरक्षा व्यवस्थाबारे प्रतिक्रिया दिएका छन् ।
ट्रम्पले पत्रकार सम्मेलनमा कार्यक्रमअघि आफ्नो टोलीलाई कुनै पनि सुरक्षा खतरा सम्बन्धी सूचना नभएको बताएका छन् । पत्रकारसँग कुरा गर्दै उनले पहिलेबाट कुनै संकेत आएको थियो कि भनेर सोध्दा कुनै जानकारी नभएको बताए ।
उनले आक्रमणको उद्देश्यबारे आफूलाई थाहा नभएको बताए । तर संदिग्ध व्यक्ति निकै खतरनाक देखिएको उनको भनाइ थियो । ट्रम्पका अनुसार ती व्यक्ति करिब ५० गज दूरीबाट दौडिँदै आएका थिए, त्यसपछि सुरक्षाकर्मीले तुरुन्तै हतियार निकालेका थिए ।
अधिकारीहरूले क्यालिफोर्नियास्थित संदिग्धको अपार्टमेन्टमा पुगेर अनुसन्धान थालेका छन् । हालसम्म शनिबार रातिको आक्रमणकारीको उद्देश्यबारे प्रहरीले स्पष्ट जानकारी दिएको छैन ।
पत्रकारले ट्रम्पसँग घटनाको कारणबारे सोध्दा उनले राजनीतिक हत्याका घटनाबारे आफूले धेरै पढेको बताए । उनका अनुसार धेरै प्रभाव पार्ने व्यक्तिलाई नै निशाना बनाइने गरेको छ । उनले पूर्व अमेरिकी राष्ट्रपति अब्राहम लिंकनको उदाहरण पनि दिएका थिए ।
हालका वर्षहरूमा ट्रम्पमाथि दुई पटक ज्यान मार्ने प्रयास भइसकेको छ । जुलाई २०२४ मा पेन्सिल्भेनियाको बटलरमा भएको चुनावी सभामा पनि उनीमाथि गोली चलाउने प्रयास भएको थियो ।
ट्रम्पले बटलरको घटनाको तुलनामा यसपटकको सुरक्षा व्यवस्था धेरै मजबुत रहेको बताए ।
ह्वाइट हाउसमा रिपोर्टिंग गर्ने पत्रकारहरुको एसोसियसनले आयोजना गरेको डिनरसहितको कार्यक्रममा राष्ट्रपति ट्रम्पसहित उपराष्ट्रपति जेडी भान्स, अन्य मन्त्रीहरु र उच्च पदस्थ सरकारी अधिकारीहरु उपस्थित वाशिंटनस्थित होटल हिल्टनमा बन्दुकधारी दौडिएर छिरेको सार्बजनिक भिडियोमा देखिएको छ ।
