काठमाडौँ । नेपाली कांग्रेसभित्र संसदीय दलको नेता चयन प्रक्रिया लम्बिँदै जाँदा आन्तरिक असन्तोष चर्किएको छ। पार्टीका निवर्तमान कार्यवाहक सभापति पूर्णबहादुर खड्काले प्रक्रिया ढिलाइ हुनु अस्वाभाविक मात्रै नभई दलको अधिकारमाथिको हस्तक्षेप भएको आरोप लगाएका छन्।
सामाजिक सञ्जालमार्फत धारिलो प्रतिक्रिया दिँदै उनले संसदीय दलको नेता चयन पार्टीको विधि र प्रक्रियाअनुसार स्वतन्त्र रूपमा सम्पन्न हुनुपर्ने स्पष्ट पारे। उनका अनुसार केन्द्रीय कार्यसमितिले विधान अनुमोदन गरेपछि दलका सदस्यहरूले सहमति वा प्रतिस्पर्धाबाट नेता छान्ने अधिकार राख्छन्, जसमा बाह्य दबाब वा हस्तक्षेप स्वीकार्य हुँदैन।
खड्काले वर्तमान अवस्थालाई “अनावश्यक हुन्डरी” को संज्ञा दिँदै यसले पार्टीको छवि कमजोर बनाइरहेको चेतावनी दिएका छन्। उनले सांसदहरूलाई तत्काल प्रक्रिया टुंग्याएर नेतृत्व चयन गर्न आग्रह गरेका छन्, अन्यथा पार्टीको विश्वसनीयतामा थप क्षति पुग्ने संकेत गरेका छन्।
कांग्रेसभित्र नेतृत्व चयनमा देखिएको अन्योलले राजनीतिक सन्देश नकारात्मक बन्दै गएको विश्लेषण भइरहेका बेला खड्काको यो अभिव्यक्तिले आन्तरिक विवाद थप सतहमा आएको देखिएको छ।
