काठमाडौँ । पोखरा महानगरपालिकाले नक्सा पास नगरी निर्माण भएका घर तथा भवनलाई नियमित तथा अभिलेखीकरण गर्न आग्रह गरेको छ ।
महानगरले स्थानीय सरकार सञ्चालन ऐन, २०७४ को नियम १०२ तथा भवन नियमित तथा अभिलेखीकरण कार्यविधि २०८० (दोस्रो संशोधन २०८२) अनुसार नक्सा पास र सम्पन्न प्रमाणपत्र नभएका घर तथा भवनलाई प्रक्रिया पूरा गराई प्रमाणपत्र प्रदान गर्ने अभियान सञ्चालन गरेको जनाएको छ ।
नगरवासीको सुविधाका लागि वैशाख १२ गतेदेखि २१ गतेसम्म प्लिन्थ क्षेत्रफल २००० वर्गफिटसम्म र तीन तल्लासम्मका घर तथा भवनका लागि सम्बन्धित वडा कार्यालयबाट सेवा उपलब्ध गराइएको छ भने सोभन्दा बढी क्षेत्रफल र तल्ला भएका घर तथा भवनका लागि महानगरको घर नक्सा तथा अभिलेखीकरण शाखाबाट सेवा दिइएको महानगरले जनाएको छ ।
महानगरले चालु आर्थिक वर्षको असार मसान्तसम्म अन्तिम पटकका लागि नियमित तथा अभिलेखीकरण गर्ने समयावधि रहेको उल्लेख गर्दै अभियान अवधिमै सेवा लिन आग्रह गरेको छ । सो क्रममा व्यवसाय दर्ता तथा नवीकरण, राजस्व दाखिला लगायतका सेवा पनि लिन सकिने जनाइएको छ ।
महानगरले नक्सा पास र सम्पन्न प्रमाणपत्र नभएका घर तथा भवनका हकमा सम्पत्ति कर, मालपोत तथा भूमिकर तिर्न, घरजग्गा नामसारी तथा किनबेच जस्ता सेवामा कानुनी समस्या आउने भन्दै अनिवार्य रूपमा प्रमाणपत्र लिन नगरवासीलाई आग्रह गरेको छ ।
