काठमाडौं । राष्ट्रिय प्रजातान्त्रिक पार्टीका अध्यक्ष राजेन्द्र लिङदेनले सुकुमबासी बस्ती र अतिक्रमित संरचना हटाउने क्रममा सरकारले पर्याप्त तयारी नगरेको भन्दै आपत्ति जनाएका छन्।
लिङदेनले सामाजिक सञ्जालमार्फत प्रतिक्रिया दिँदै सार्वजनिक स्थल खाली गर्ने नाममा हतारमा मन्दिर, विद्यालय र बौद्ध गुम्बा भत्काइनु अनुचित भएको उल्लेख गरे। विशेषगरी बुद्ध जयन्ती कै दिन यस्ता संरचना हटाइएकोप्रति उनले असन्तुष्टि जनाए।
उनले मानिसको सम्पत्तिभन्दा आस्थामाथि हुने आक्रमण अझ संवेदनशील र खतरनाक हुने बताएका छन्। “विकास जीवनका लागि हुनुपर्छ, जीवन विकासका लागि होइन,” भन्दै उनले विस्थापनका क्रममा मानवीय पक्षमा ध्यान दिन सरकारलाई आग्रह गरेका छन्।
लिङदेनले इतिहास, धर्म र परम्पराको संरक्षणसँगै अघि बढाइने विकास मात्रै दिगो हुने उल्लेख गर्दै सरकारलाई पर्याप्त गृहकार्यसहित निर्णय लिन सुझाव दिएका छन्।
