काठमाडौँ । संघीय संसद् सचिवालयले सांसदहरूका लागि स्वकीय सचिवको सुविधा आवश्यक परेमा सम्बन्धित दलहरूले औपचारिक रूपमा लिखित माग गर्नुपर्ने नयाँ प्रक्रिया अघि सारेको छ।
संघीय संसद् सचिवालय ले यही व्यवस्था कार्यान्वयनका लागि संसदीय दलहरूलाई पत्राचार गरेको हो। सचिवालयका अनुसार अब सांसदका लागि स्वकीय सचिवको व्यवस्था गर्न दलहरूको औपचारिक माग अनिवार्य हुनेछ।
प्रतिनिधिसभाका सचिव हर्कराज राई ले वैशाख १४ गते नै दलहरूलाई पत्र पठाउँदै प्रक्रिया अघि बढाउन निर्देशन दिएका छन्। पत्रमा स्वकीय सचिव व्यवस्थापनका लागि सबै दल र स्वतन्त्र सांसदहरूको तर्फबाट लिखित अनुरोध आवश्यक हुने उल्लेख छ।
यो व्यवस्था प्रतिनिधिसभामा रहेका नेपाली कांग्रेस, नेकपा एमाले, राष्ट्रिय स्वतन्त्र पार्टी, राष्ट्रिय प्रजातन्त्र पार्टी लगायत सबै दलहरूमा लागू हुनेछ।
सचिवालयका अनुसार दलहरूले माग पठाएपछि त्यसलाई संकलन गरी कानुन, न्याय तथा संसदीय मामिला मन्त्रालयमा पठाइनेछ। यससँगै सांसदको सुविधा व्यवस्थापन अब औपचारिक प्रक्रियामा आधारित हुने संकेत देखिएको छ।
