काठमाडौँ । पोखरा–नारायणगढ सडकअन्तर्गत बुद्धसिंह मार्गको घुमाउनेस्थित त्रिशूली नदीमा निर्माणाधीन मोटरेबल पुलको ठेक्का सम्झौता अन्ततः रद्द गरिएको छ। निर्माण सुरु भएको १२ वर्ष बित्दा पनि काम सम्पन्न नभएपछि सडक डिभिजन कार्यालय दमौलीले निर्माण कम्पनीसँगको सम्झौता तोडेको हो।
आँबुखैरेनी गाउँपालिका र भरतपुर महानगरपालिकालाई जोड्ने उक्त पुल निर्माणका लागि पटक–पटक निर्देशन दिँदा पनि काम अघि नबढेपछि कानुनी प्रक्रिया अनुसार कारबाही सुरु गरिएको कार्यालयले जनाएको छ। १०५ मिटर लामो पुलको हालसम्म करिब ३६ प्रतिशत मात्र काम सम्पन्न भएको छ।
पुल निर्माणमा ढिलाइ हुँदा स्थानीयवासीले लामो समयदेखि सास्ती भोग्दै आएका छन्। पुल बनेमा दमौलीदेखि चितवनसम्मको दूरी करिब २५ किलोमिटर छोटिने बताइएको छ। हाल यात्रुहरू झोलुङ्गे पुल प्रयोग गर्न बाध्य छन् भने साना सवारीसाधन सञ्चालनमा समेत समस्या हुँदै आएको छ।
ठेक्का रद्द भएसँगै अब नयाँ प्रक्रिया मार्फत बाँकी निर्माण कार्य अघि बढाइने सडक डिभिजन कार्यालयले जनाएको छ।
