काठमाडौँ । नेपाल राष्ट्र बैंकले उपदान तथा पेन्सन कोषमा रहेको तीन अर्ब ३० करोड रुपैयाँ बराबरको रकम बैंक तथा वित्तीय संस्थामा लगानी गर्ने भएको छ।
केन्द्रीय बैंकले सार्वजनिक सूचना जारी गर्दै ३६६ दिनका लागि उक्त रकम लगानी गर्न लागिएको जानकारी दिएको हो। राष्ट्र बैंकले क, ख र ग वर्गका बैंक तथा वित्तीय संस्थालाई सो रकम लगानीका लागि आवेदन दिन आह्वान गरेको छ।
सूचना अनुसार, लगानीका लागि योग्य हुन बैंक तथा वित्तीय संस्थाले कम्तीमा दुई वर्षदेखि सञ्चालनमा रहेको हुनुपर्ने, बैंकबाट तोकिएको न्यूनतम कूल पुँजीकोष कायम गरेको हुनुपर्ने, निष्क्रिय कर्जा अनुपात कूल कर्जाको आठ प्रतिशत र खुद निष्क्रिय कर्जा अनुपात तीन प्रतिशत ननाघेको हुनुपर्ने शर्त पूरा गर्नुपर्नेछ।
यस्ता पात्रता भएका बैंक तथा वित्तीय संस्थाले यही असोज ३० गतेसम्म आफूले लिन चाहेको रकम र सो रकमका लागि प्रस्तावित ब्याजदर उल्लेख गरी आवेदन पेश गर्नुपर्ने सूचनामा जनाइएको छ।
राष्ट्र बैंकले यस्तो लगानीलाई वित्तीय प्रणालीमा तरलता सन्तुलन कायम गर्न र उपदान–पेन्सन कोषको व्यवस्थापनलाई प्रभावकारी बनाउन गरिएको जनाएको छ।
