काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ ले मधेस प्रदेशमा बनेको नयाँ सत्ता समीकरण कुनै एक प्रदेशको सीमित घटना नभई, देशका अन्य प्रदेशमा पनि त्यही प्रभाव फैलिने दाबी गरेका छन् ।
मधेस प्रदेशस्तरीय एकता सन्देश सभालाई सम्बोधन गर्दै उनले मधेसमा लामो समयदेखि चल्दै आएको सत्ता साझेदारी ढाँचामा परिवर्तन आएपछि ‘नयाँ राजनीतिक समीकरण’ बसालिएको बताए। उनका अनुसार, यो परिवर्तनले अन्य प्रदेशमा समेत यस्तै पुनर्संयोजनको सुरुआत गर्नेछ।
“मधेसबाट सुरू भएको नयाँ समीकरण अब सबै प्रदेशमा देखिन्छ,” प्रचण्डले भने, “गणतन्त्र स्थापना भइसकेपछि पनि जनताको जीवनस्तरमा अपेक्षित सुधार नआएपछि उठेको जेन-जी आन्दोलनले सबै राजनीतिक दललाई गम्भीर आत्मसमीक्षा गर्न बाध्य बनाएको छ। अब सुधारका साथ अघि बढ्ने अवसर आएको छ।”
उनले जेन-जी आन्दोलनलाई देशको राजनीतिक नेतृत्वका लागि “जागरणको घण्टी”को रूपमा व्याख्या गर्दै, त्यसपछि व्यापक समीक्षा र पुनर्संयोजनका आधारमा नयाँ ढङ्गले देश परिवर्तन गर्ने यात्रा सुरु भएको बताए।
प्रचण्डका अनुसार, ‘जनताको साझा एकता’ नै प्रतिगमनको प्रयासलाई पराजित गर्ने मुख्य आधार हो। उनले एमालेभित्रका वामपन्थी, क्रान्तिकारी समूहदेखि देशभरिका विभिन्न कम्युनिस्ट शक्तिलाई एकीकृत गर्दै लैजाने जिम्मेवारी नेकपाले लिएको स्पष्ट पारे।
मधेस प्रदेशमा अधुरा रहेका ठूला विकास आयोजना उल्लेख गर्दै उनले ती अधिकांश कम्युनिस्ट नेतृत्वकै पहलमा सुरू भएको दाबी गरे। “मधेसका महत्त्वपूर्ण विकास आयोजना हामीले सुरू गरेका हौँ, त्यसलाई निष्कर्षमा पुर्याउने जिम्मा पनि कम्युनिस्ट नेतृत्वकै सरकारको हुनेछ,” उनले भने।
उनका अनुसार, नयाँ राजनीतिक समीकरण केवल सरकारको संरचनाको परिवर्तन मात्र नभई, जेन-जी आन्दोलनपछिको राजनीतिक आत्मसमीक्षा, दलभित्रको पुनर्संयोजन, र विकासलाई गति दिने दीर्घकालीन रोडम्यापसँग पनि जोडिएको छ ।
राजनीतिक स्थिरताको खोजीमा रहेको मधेसमा नयाँ समीकरणले कति टिकाउ रूप लिन्छ र अन्य प्रदेशमा त्यसको कस्तो प्रभाव देखिन्छ, अबका केही हप्ता/महिनामा स्पष्ट हुँदै जानेछ।
