काठमाडौँ । नेपाली काँग्रेसको विशेष महाधिवेशन अन्तर्गत आज निर्वाचन प्रक्रिया सम्पन्न हुँदैछ।
विधान संशोधन र राजनीतिक प्रस्ताव सर्वसम्मत पारित भएसँगै काँग्रेसको विशेष महाधिवेशन औपचारिक रूपमा निर्वाचन चरणमा प्रवेश गरेको हो।
हिजो सम्पन्न बन्दसत्रमा महामन्त्रीद्वय गगन थापा र विश्वप्रकाश शर्माले प्रस्तुत गरेको विधान संशोधन प्रस्ताव तथा राजनीतिक प्रस्ताव माथि प्रतिनिधिहरूले व्यापक छलफल गरेका थिए। छलफलका क्रममा आएका सुझावहरूलाई समेट्दै दुवै प्रस्तावलाई बन्दसत्रले सर्वसम्मत रूपमा पारित गरेको हो।
बन्दसत्रको समापनसँगै विशेष महाधिवेशनको अर्को महत्वपूर्ण चरणका रूपमा निर्वाचन प्रक्रिया अघि बढाइएको हो। बन्दसत्रले निर्वाचन समिति गठन गरेपछि समितिले आवश्यक तयारी पूरा गर्दै निर्वाचनका कार्यक्रम सार्वजनिक गरेको थियो। सोही कार्यक्रमअनुसार हिजो उम्मेदवारी मनोनयन दर्ता सम्पन्न भइसकेको छ भने आज मतदान प्रक्रिया सञ्चालन हुने भएको हो।
निर्वाचन समितिका अनुसार निर्वाचन प्रक्रिया आज बिहान ८ बजेदेखि सुरु हुनेछ। निर्धारित समय र प्रक्रियाअनुसार मतदान, मतगणना तथा नतिजा सार्वजनिक गर्ने तयारी भइरहेको समितिले जनाएको छ।
विशेष महाधिवेशनको निर्वाचनलाई काँग्रेसको आन्तरिक लोकतन्त्र सुदृढ बनाउने महत्वपूर्ण अवसरका रूपमा हेरिएको छ। पार्टीभित्र नीति, नेतृत्व र संगठनात्मक संरचनामा सुधार ल्याउने उद्देश्यसहित आयोजना गरिएको यस महाधिवेशनको निर्वाचन परिणामले काँग्रेसको भावी दिशा र रणनीतिमा प्रभाव पार्ने अपेक्षा गरिएको छ।
