काठमाडौँ । नबिल बैंक लिमिटेडको सञ्चालक समिति अध्यक्षमा निर्वाणकुमार चौधरी चयन भएका छन्।
बैंकको हालै सम्पन्न ६९९औँ सञ्चालक समिति बैठक ले चौधरीलाई अध्यक्षमा चयन गरेको हो। नेपाल राष्ट्र बैंकबाट औपचारिक रूपमा सपथ ग्रहण गरेपछि उनले अध्यक्षको जिम्मेवारी सम्हाल्ने बैंकले जनाएको छ।
यससँगै बैंकका निवर्तमान अध्यक्ष उपेन्द्रप्रसाद पौडेलले आफ्नो दुई कार्यकाल सफलतापूर्वक सम्पन्न गरेका छन्। पौडेलको नेतृत्वकाललाई नबिल बैंकको दिगो विकास र संस्थागत सुदृढीकरणका दृष्टिले महत्वपूर्ण मानिएको छ।
बैंकका अनुसार पौडेलको कार्यकालमा दिगो बैंकिङ अभ्यास, टिम निर्माण, डिजिटल रूपान्तरणको सुदृढीकरण, नबिल स्कूल अफ सोसल इन्टरप्रेनरसिप (Nabil SSE) को स्थापना तथा मर्जर प्रक्रियालाई सफल बनाउन उल्लेखनीय योगदान पुगेको थियो। उनको नेतृत्वमा बैंकले संस्थागत क्षमता विस्तार गर्दै वित्तीय क्षेत्रमै उदाहरणीय पहिचान बनाउन सफल भएको बैंकको भनाइ छ।
४१औँ वार्षिक साधारणसभाबाट १२.५० प्रतिशत नगद लाभांश पारित
यसैबीच, नबिल बैंकको ४१औँ वार्षिक साधारणसभा ले शेयरधनीहरूका लागि १२.५० प्रतिशत नगद लाभांश पारित गरेको छ। सोमबार सम्पन्न साधारणसभा निवर्तमान अध्यक्ष उपेन्द्रप्रसाद पौडेलको अध्यक्षतामा सम्पन्न भएको थियो।
सभाले बैंकको आर्थिक वर्ष २०८१/८२ को मुनाफाबाट शेयरधनीलाई वितरण गर्न प्रस्ताव गरिएको लाभांशलाई सर्वसम्मत रूपमा अनुमोदन गरेको हो।
त्यसैगरी, साधारणसभाले संस्थापक शेयरधनीतर्फबाट सञ्चालक समितिमा प्रतिनिधित्व गर्ने एक सञ्चालक पदमा अनिल केशरी शाहलाई निर्विरोध निर्वाचित गरेको छ।
नयाँ नेतृत्व, स्थिर व्यवस्थापन र दिगो रणनीतिसहित नबिल बैंक आगामी दिनमा पनि बैंकिङ क्षेत्रमा आफ्नो अग्रणी भूमिका अझ मजबुत बनाउँदै लैजाने अपेक्षा गरिएको छ।
