काठमाडौँ । राष्ट्रिय स्वतन्त्र पार्टी (रास्वपा) भित्र समानुपातिक बन्दसूचीलाई लिएर असन्तोष चुलिँदै गएको छ।
पार्टीले टासी लाजोम शेर्पाको नाम बिना स्पष्ट आधार समानुपातिक सूचीबाट हटाएको आरोप लगाउँदै हुम्ला र मुगुका नेता तथा कार्यकर्ताले केन्द्रीय कार्यालयमा विरोध प्रदर्शन गरेका छन्।
काठमाडौँको वनस्थलीस्थित रास्वपाको केन्द्रीय कार्यालय अगाडि दुई जिल्लाका सभापतिको नेतृत्वमा भइरहेको प्रदर्शनमा सहभागीहरूले पार्टीको निर्णय अपारदर्शी र अन्यायपूर्ण भएको दाबी गरेका छन्। उनीहरूले सूची संशोधनको निर्णय तत्काल पुनरावलोकन गर्न माग गर्दै नेतृत्वसँग स्पष्ट जवाफ चाहिएको बताएका छन्।
प्रदर्शनकारीहरूका अनुसार रास्वपाले टासी शेर्पालाई ‘भूराजनीतिक कारण’ देखाउँदै बन्दसूचीबाट हटाएको थियो। तर शेर्पाले आफू तिब्बती नरहेको र त्यससँग कुनै किसिमको सम्बन्ध वा साइनो नभएको स्पष्ट पार्दै आएकी छन्। उनले पार्टीको निर्णय तथ्य र प्रमाणविहीन भएको भन्दै निरन्तर आपत्ति जनाउँदै आएकी छिन्।
टासी शेर्पा हिमाली क्षेत्रको पर्यावरण, संस्कृति र सामाजिक जीवनसँग सम्बन्धित विषयमा अध्ययन र अनुसन्धान गरेकी अध्येता हुन्। जेनजी (Gen Z) आन्दोलनपछि वैकल्पिक राजनीतिप्रति आकर्षित हुँदै उनी रास्वपा प्रवेश गरेकी थिइन्। उनको नाम बन्दसूचीबाट हटाइएपछि हिमाली क्षेत्रका कार्यकर्तामा गहिरो असन्तोष देखिएको छ।
प्रदर्शनकारीहरूले पार्टीले समावेशी र वैकल्पिक राजनीतिका कुरा गरे पनि व्यवहारमा भने विपरीत कदम चालेको आरोप लगाएका छन्। उनीहरूले नेतृत्वले तत्काल निर्णय सच्याएर न्यायोचित समाधान दिनुपर्ने माग गरेका छन्।
समानुपातिक बन्दसूचीसम्बन्धी यो विवादले रास्वपाभित्र आन्तरिक छलफल र दबाब बढाउने देखिएको छ भने पार्टी नेतृत्वले यस विषयमा कस्तो धारणा सार्वजनिक गर्छ भन्ने चासो बढेको छ।
