काठमाडौँ । नेपाली कांग्रेसभित्र उम्मेदवार छनोट प्रक्रियालाई लिएर नयाँ प्रसंग थपिएको छ। कोशी प्रदेश कार्यसमितिले उदयपुर क्षेत्र नम्बर १ बाट प्रतिनिधि सभा सदस्यका लागि प्रस्ताव गरेको सिफारिस सूचीमा परेका डा. नारायण खड्काले आफ्नो नाम सो सूचीबाट हटाइदिन औपचारिक रूपमा आग्रह गरेका छन्।
डा. खड्काले नेपाली कांग्रेसको केन्द्रीय कार्यालयलाई सम्बोधन गर्दै पत्र लेखी सिफारिस सूचीप्रति आफ्नो असहमति जनाएका हुन्। उनले प्रदेश कार्यसमितिबाट पठाइएको प्रस्तावित सूचीमा आफ्नो नाम समावेश भएको विषयमा केन्द्रीय कार्यालयको सम्बन्धित निकायलाई जानकारी गराइदिन आग्रह गरेका छन्।
खड्काले पत्रमा आफूलाई प्रतिनिधि सभा सदस्यका लागि प्रस्तावित उम्मेदवारको रूपमा राखिएको जानकारी पाएको उल्लेख गर्दै सो सूचीबाट आफ्नो नाम हटाइदिनु उपयुक्त हुने स्पष्ट धारणा व्यक्त गरेका छन्। पत्रमा उनले सन् २०८२ को प्रतिनिधि सभा निर्वाचनका लागि उदयपुर क्षेत्र नम्बर १ बाट उम्मेदवार सिफारिस गरिएको सूचीमा आफ्नो नाम परेकामा असहमति जनाउँदै केन्द्रको ध्यानाकर्षण गराएका छन्।
उनको यो कदमलाई पार्टीभित्र उम्मेदवार छनोट प्रक्रियामा देखिएको असहजता वा व्यक्तिगत–राजनीतिक कारणसँग जोडेर हेरिएको छ। यद्यपि खड्काले सार्वजनिक रूपमा नाम फिर्ता लिनुको कारण विस्तृत रूपमा खुलाएका छैनन्।
कोशी प्रदेश कांग्रेसबाट आएको सिफारिस सूचीमा रहेका एक नेताले नै स्वयं नाम हटाउन माग गरेपछि उक्त क्षेत्रको उम्मेदवार छनोट प्रक्रिया थप चासोको विषय बनेको छ। पार्टी नेतृत्वले अब यस विषयमा के निर्णय गर्छ भन्नेमा राजनीतिक वृत्तको ध्यान केन्द्रित भएको छ।
