काठमाडौँ । उपत्यकामा अतिक्रमण हटाउने सरकारी अभियान तीव्र भइरहँदा प्रभावित नागरिकको अवस्था भने झन् कष्टकर बन्दै गएको छ। काठमाडौँ महानगरपालिका–९ अन्तर्गत गैरीगाउँ–सिनामङ्गल क्षेत्रमा घरटहरा भत्काइएपछि सुकुमबासीहरू वर्षाको मारमा परेका छन्।
बस्ती खाली गराइएपछि खुला चौरमा राखिएका खाद्यान्न, लत्ताकपडा र दैनिक उपभोगका सामग्री साँझ परेको वर्षाले भिजाउँदा उनीहरूको दैनिकी अस्तव्यस्त बनेको छ। पर्याप्त त्रिपाल वा अस्थायी आश्रयको व्यवस्था नहुँदा धेरै परिवार खुला आकाशमुनि बस्न बाध्य भएका छन्।
स्थानीयका अनुसार केहीले पहिले नै वैकल्पिक स्थान खोजे पनि धेरै अझै डेरा नपाएर समस्यामा छन्। कतिपयले सामान सुरक्षित राख्ने ठाउँसमेत नपाउँदा चौरमै थुपारेर बसिरहेका छन्।
सामान ओसारपसारमा खटिएका सवारी चालकका अनुसार धेरै परिवारको सरसामान धेरै मात्रामा भएकाले एकैपटक सार्न कठिन भइरहेको छ। कतिपयले डेरा खोज्न गएका कारण सामान अलपत्र छोडिएको छ।
भत्काइएको क्षेत्रमा अझै ठूलो परिमाणमा सरसामान थुप्रिएको देखिन्छ। ती सामग्री कुर्न बसेका मानिसहरू वर्षामा भिज्न बाध्य छन्।
अतिक्रमण हटाउने अभियान जारी रहे पनि प्रभावित नागरिकका लागि पर्याप्त पूर्वतयारी र व्यवस्थापन नहुँदा मानवीय संकट गहिरिँदै गएको देखिन्छ।
