काठमाडौं । नेपाली कांग्रेसनिकट नेविसंघले मनोहरा खोलाको किनारमा सञ्चालनमा रहेको सरस्वती आधारभूत विद्यालयमा डोजर चलाइएको घटनाप्रति गम्भीर आपत्ति जनाएको छ।
सुकुमबासी बस्ती हटाउने क्रममा वैकल्पिक व्यवस्था नगरी विद्यालयमा समेत डोजर प्रयोग गरिएको भन्दै नेविसंघले असन्तुष्टि व्यक्त गरेको हो। प्रवक्ता सुरज सेजुवालद्वारा जारी विज्ञप्तिमा विद्यालय केवल भौतिक संरचना नभई बालबालिकाको सिकाइ, संरक्षण र भविष्य निर्माणको आधार भएकाले तत्काल समाधान आवश्यक रहेको उल्लेख छ।
नेविसंघले प्रभावित विद्यार्थीहरूको पठनपाठन निरन्तरता सुनिश्चित गर्न सुरक्षित वैकल्पिक स्थानमा विद्यालय सञ्चालन, अस्थायी कक्षा व्यवस्थापन तथा आवश्यक शैक्षिक सामग्री र शिक्षक उपलब्ध गराउन सम्बन्धित निकायसँग आग्रह गरेको छ।
विज्ञप्तिमा उक्त घटनाले २७५ विद्यार्थीको नियमित अध्ययन र शिक्षाको अधिकारमा प्रत्यक्ष असर परेको जनाउँदै, नयाँ शैक्षिक सत्र सुरु हुनुअघि वैकल्पिक योजना बिना विद्यालय भत्काइनु संवेदनशील र आपत्तिजनक भएको उल्लेख गरिएको छ।
