काठमाडौं। काठमाडौँ महानगरपालिकाले अतिक्रमणविरुद्धको अभियानलाई थप तीव्र बनाउँदै तिलगंगास्थित पशुपति क्षेत्रका अवैध संरचना हटाउन सुरु गरेको छ।
शनिबार साँझ ६ बजेदेखि सुरु गरिएको अभियान अन्तर्गत सरकारी जमिनमा अनधिकृत रूपमा बनाइएका घरटहरा भत्काउने काम भइरहेको महानगर प्रहरी बलले जनाएको छ। प्रहरी प्रमुख विष्णु जोशीका अनुसार सार्वजनिक जग्गा संरक्षणका लागि यस्तो कदम चालिएको हो।
महानगरले तिलगंगासँगै स्वयम्भू, बालाजु–गोङ्गबु बसपार्क र देवीनगर क्षेत्रमा पनि अवैध संरचना हटाउने काम अघि बढाइरहेको छ। पछिल्लो समय काठमाडौं उपत्यकाभरि अतिक्रमण हटाउने अभियानलाई प्राथमिकतामा राखिएको देखिन्छ।
यसअघि शुक्रबार बल्खु र कालिमाटी क्षेत्रका नदी किनारमा रहेका जोखिमयुक्त बस्तीहरू पनि हटाइएको थियो। महानगरका अनुसार हालसम्म उपत्यकामा सरकारी, सार्वजनिक तथा निजी जग्गा अतिक्रमण गरी निर्माण गरिएका करिब दुई हजारभन्दा बढी घरटहरा हटाइसकिएको छ।
महानगरको यो अभियानलाई सार्वजनिक सम्पत्ति संरक्षण र सुरक्षित बसोबास व्यवस्थापनतर्फको महत्वपूर्ण कदमका रूपमा हेरिएको छ।
