काठमाडौं । जेनजीको वृहद भर्चुअल वैठकमा भावि प्रधानमन्त्रीबारे गम्भीर छलफल गरिएको छ ।
पाँच हजारभन्दा बढी सहभागी भएको उक्त बैठकमा पूर्वप्रधानन्यायाधीश सुशीला कार्कीलाई प्रधानमन्त्री बनाउने प्रस्तावले सबैभन्दा धेरै समर्थन पाएको छ।
बैठकमा कुलमान घिसिङ, सागर ढकाल, हर्क सामपाङ लगायत केही चर्चित अनुहारहरूको नाम पनि उठाइयो। तर सहभागीहरूबाट सबैभन्दा धेरै समर्थन सुशीला कार्कीले पाएकी हुन्।
यसअघि पनि कार्कीलाई जेनजी पक्षबाट प्रधानमन्त्री बन्न प्रस्ताव गरिएको थियो। तर कार्कीले कम्तीमा एक हजार जनाको समर्थन सहितको हस्ताक्षर लिएर आउन भनेकी थिइन् । स्रोतका अनुसार हालसम्म २ हजार ५ सय भन्दा बढीको हस्ताक्षर संकलन गरी कार्कीलाई बुझाइएको छ ।
बालेनले फोन उठाएनन् अनि नाम फेरियो
बैठकमा काठमाडौँ महानगरपालिकाका मेयर बालेन्द्र साह (बालेन) को नाम सबैभन्दा लोकप्रिय उम्मेदवारका रूपमा उठेको थियो । तर, पटक पटक सम्पर्क गर्न खोज्दा पनि बालेनले फोन नै उठाएनन् । एक प्रतिनिधिले भने । बालेनले फोन नउठाएपछि अन्य नामहरूमाथि छलफल सुरु भएको हो।
र्यान्डम नेपालीको पनि चर्चा
बैठकमा “र्यान्डम नेपाली” नामले चिनिने राष्ट्रविमोचन तिमल्सिना पनि लोकप्रिय उम्मेदवारमध्ये एक थिए । उनी कानून व्यवसायी हुन् र नेशनल ल कलेजका कार्यवाहक प्रिन्सीपल समेत भइसकेका छन् । तर उनले भनेका छन्, “अरू कोही तयार भएनन् भने मात्र म अघि सर्छु।”
