काठमाडौं । नेकपा एमालेका उपमहासचिव योगेश भट्टराईले पार्टी भित्र अहिले चलिरहेको विवादका बारेमा व्यंग्यात्मक कविता लेखेका छन् ।  

उनले कवितामा पार्टीका कार्यवाहक अध्यक्ष रामबहादुर थापा बादलमाथि व्यंग्य गरेका छन् ।  उनले वादल मडारिएपछि मुसलधारे वर्षा भएको, जबज निथ्रुकै भिजेको र आफुहरु हेरेको हेर्यै भएको उल्लेख गरेका छन् ।  

योगेशले कवितामार्फत भनेका छन्: 

वादल मडारियो 
मुसलधारे वर्षा भयो 
जबज निथ्रुकै भिज्यो 
मदन तीन छक्क पर्नुभयो 
हामी हेरेको हेर्यै भयौ ! 

एमालेमा संसदीय दलका नेता समेत रहेका बादलले केहि दिनअघि संसदमा दिएको भाषणका कारण विवाद उत्पन्न भएको छ ।  बादल अभिव्यक्ति सचिवालय बैठक बसेर सच्याएपनि एमालेको विवाद रोकिने संकेत देखिएको छैन । विवादका बीच एमालेमा विशेष महाधिवेशनको माग गर्न हस्ताक्षर अभियान समेत चलाइएको छ ।  

Read More

काठमाडौँ । एपोलो हाइड्रोपावर कम्पनी लिमिटेडको सर्वसाधारणका लागि प्रारम्भिक सार्वजनिक निष्कासन (आइपिओ) खुला भएको छ ।

कम्पनीले प्रतिकित्ता १०० रुपैयाँ अंकित दरमा ७ लाख ८० हजार २०० कित्ता सेयर निष्कासन गरेको हो । यो आइपिओ चैत ३० गतेसम्म खुला रहनेछ भने पूर्ण रूपमा बिक्री नभएमा वैशाख १० गतेसम्म म्याद थप गर्न सकिने बताइएको छ ।

कम्पनीको जारी पूँजी ४७ करोड रुपैयाँ रहेको छ । यसमध्ये ३० प्रतिशत अर्थात् १४ लाख १० हजार कित्ता सेयर सर्वसाधारणका लागि छुट्याइएको छ । कुल निष्कासनमध्ये १० प्रतिशत अर्थात् ४ लाख ७० हजार कित्ता सेयर ओखलढुंगा, सोलुखुम्बु र रामेछाप जिल्लाका आयोजना प्रभावित स्थानीय बासिन्दाका लागि छुट्याइएको छ । बाँकी २० प्रतिशत अर्थात् ९ लाख ४० हजार कित्ता सर्वसाधारणका लागि राखिएको छ।

सर्वसाधारणतर्फ छुट्याइएको सेयरमध्ये १० प्रतिशत अर्थात् ९४ हजार कित्ता वैदेशिक रोजगारीमा रहेका नेपालीका लागि छुट्याइएको थियो । त्यस्तै २ प्रतिशत अर्थात् १८ हजार ८०० कित्ता कर्मचारीका लागि र कुल सेयरमध्ये ५ प्रतिशत अर्थात् ४७ हजार कित्ता सामूहिक लगानी कोषका लागि सुरक्षित गरिएको छ । बाँकी ७ लाख ८० हजार २०० कित्ता सेयर आजदेखि सर्वसाधारणका लागि खुला गरिएको हो ।

सार्वजनिक निष्कासनको बिक्री प्रबन्धकमा हिमालयन क्यापिटल लिमिटेड रहेको छ। लगानीकर्ताले न्यूनतम १० कित्तादेखि अधिकतम ९४ हजार कित्तासम्म आवेदन दिन सक्नेछन् ।

केयर रेटिङ्स नेपाल लिमिटेडले कम्पनीको जारीकर्ता मूल्याङ्कन ‘केयर-एनपी बीबी माइनस’ र दीर्घकालीन बैंक सुविधा मूल्याङ्कन पनि सोही स्तरमा यथावत राखेको छ । यसले कम्पनीको वित्तीय दायित्व पूरा गर्ने क्षमतामा मध्यम स्तरको जोखिम रहेको जनाउछ ।

एपोलो हाइड्रोपावर कम्पनी लिमिटेड प्रारम्भमा निजी लिमिटेड कम्पनीका रूपमा स्थापना भई २०२२ सेप्टेम्बर २२ मा सार्वजनिक लिमिटेड कम्पनीमा रूपान्तरण भएको हो । कम्पनीले ओखलढुंगा जिल्लामा ६ मेगावाट क्षमताको बहावमा आधारित जलविद्युत आयोजना विकास गरिरहेको छ ।

Read More

काठमाडौँ । नेकपा एमालेका अध्यक्ष केपी शर्मा ओली र काँग्रेस नेता रमेश लेखक हाजिर जमानीमा छुट्ने भएका हुन् । सर्वोच्च अदालतको परमादेश अनुसार दुबैलाई हाजिरी जमानीमा छोड्ने तयारी भएको हो ।

ओली र लेखकविरुद्ध जिल्ला अदालत काठमाडौंले तेस्रोपटक ५ दिनको लागि लिएको म्याद आज सकिन लागेकाले दुवैलाई रिहा गरिन लागेको छ । जिल्ला प्रहरी परिसर काठमाडौँले सरकारी वकिलको कार्यालयबाट अनुमति लिएर रिहाईको प्रक्रिया अगाडी बढाएको छ  । 

गत सोमबार सर्वोच्च अदालतका न्यायाधीश विनोद शर्मा र सुनिल कुमार पोखरेलको संयुक्त इजलासले ओली र लेखकलाई म्याद थप नगर्न परमादेश आदेश जारी गरेका थिए । सर्वोच्चले अहिले थप गरेको म्याद भित्र नै अनुसन्धान टुंगाउन र अनुसन्धान नसकिएमा ओली र लेखकलाई रिहा गरेर अनुसन्धान जारी राख्न आदेश दिएको थियो ।    

गत भदौ २३ र २४ को आन्दोलनको जाँचबुझ गर्न गठित कार्की आयोगको सिफारिसमा प्रहरीले तत्कालीन प्रधानमन्त्री ओली र गृहमन्त्री लेखकलाई प्रहरीले चैत १४ गते पक्राउ गरेको थियो ।

Read More

काठमाडौं । नेपाली बजारमा आज सुनचाँदीको मुल्य घटेको छ ।

नेपाल सुनचाँदी व्यवसायी महासङ्घका अनुसार विहिबार छापावाल सुनको मुल्य तोलाको ४३ सयले घटेर तोलाको २ लाख ९४ हजार ७ सयमा कारोबार भइरहेको छ । यसअघि बुधबार सुन तोलाको २ लाख ९९ हजारमा कारोबार भएको थियो ।

यस्तै, आज चाँदीको मूल्य पनि घटेको छ । महासङ्घका अनुसार आज चाँदी तोलाको १५० रुपैयाँले घटेर ४८७५ मा कारोबार भइरहेको छ । यसअघि बुधबार चाँदी तोलाको ५०२५ मा कारोबार भएको थियो ।

Read More

काठमाडौँ । वर्षाका कारण दाउन्ने सडक खण्ड अवरुद्ध भएको छ । पूर्वपश्चिम राजमार्गअन्तर्गत नवलपरासी (बर्दघाट सुस्तापूर्व) को विनयी त्रिवेणी गाउँपालिका-२ दाउन्ने खण्डमा बर्षापछि सडक हिलो र चिप्लो हुँदा सडक अवरुद्ध भएको हो ।

दाउन्नेको घिउखोला र विश्वकर्मा मन्दिर नजिकै सडक चिप्लो भई सवारी साधन सडक फसेका कारण  यातायात अवरुद्ध भएको जिल्ला प्रहरी कार्यालय नवलपरासी (बर्दघाट सुस्तापूर्व) ले जानकारी दिएको छ । प्रहरीले सडक खुलाउने प्रयास भइरहेको जानकारी दिएको छ ।

बुटवल-नारायणगढ सडक विस्तारअन्तर्गत दाउन्ने खण्डमा निर्माणको काम नसकिँदा सामान्य वर्षामा पनि सडक अवरुद्ध हुदै आएको छ ।

Read More

काठमाडौँ । होर्मुज जलडमरूमध्यमा गत महिना भएको आक्रमणपछि हराइरहेका तीन थाई नाविकको मृत्यु पुष्टि भएको छ । थाइल्यान्डका उपप्रधानमन्त्री तथा विदेशमन्त्री सिहासक फुआंगकेतकेओले यसको जानकारी दिएका हुन् ।

गत मार्च ११ मा होर्मुज जलडमरूमध्य हुँदै गइरहेको थाई झण्डा बोकेको १८० मिटर लामो मालवाहक जहाज ‘मयूरी नारी’ मा आक्रमण भएको थियो । जहाजमा २३ जना चालक दलका सदस्य सवार थिए ।

आक्रमणपछि ओमानका अधिकारीहरूले उद्धार अभियान सञ्चालन गरी २० जनालाई सुरक्षित निकालेका थिए भने तीन जना बेपत्ता भएका थिए । ती बेपत्ता तीनै जनाको मृत्यु भएको पुष्टि गरिएको हो ।

मन्त्री फुआंगकेतकेओले यसै महिनाको अन्त्यतिर ओमान भ्रमण गर्ने बताएका छन् । उनले त्यहाँ उद्धार कार्यमा सहयोग गर्ने अधिकारीहरूलाई धन्यवाद दिने र होर्मुज क्षेत्रमा अड्किएका ९ थाई जहाजका लागि सुरक्षित मार्ग सुनिश्चित गर्न सहयोग माग्ने जानकारी दिएका छन् ।

Read More

काठमाडौं । जारी आइपिएलमा आज एक खेल हुदैछ । आज कोलकोता नाइट राइडर्स र लखनउ सुपर जाईन्टबीच खेल हुदैछ । इडेन गार्डेनमा हुने यो खेल नेपाली समय अनुसार साँझ ७: ४५ बजेदेखि शुरु हुदैछ । 

जारी आइपिएलमा कोलकोताले ३ खेलमा २ खेलमा हार बेहोरेको छ भने एक खेल बर्षाले रद्ध भएको थियो ।  पछिल्लो पञ्जावविरुद्धको खेल वर्षाले हुन नसक्दा दुवैले एक एक अंक बाँडेका थिए । त्यसअघि कोलकोता सनराइजर्स हैदरावाद र मुम्बई इण्डियन्ससँग हार बेहोरेको थियो । 

त्यस्तै लखनउ सुपर जाईन्टले खेलेका दुई खेलमा एक जित र एक हार बेहोरेको छ ।  लखनउले सनराइजर्स हैदरावादसँगको खेल जितेको छ भने दिल्ली क्यापिटल्सविरुद्धको पहिलो खेल हारेको थियो । 

सम्भावित प्लेइङ ११: 

कोलकाता नाइट राइडर्स: अजिंक्य रहाणे (कप्तान), फिन एलेन, क्यामरुन ग्रीन, अङ्क्रिश रघुवंशी,  रिंकु सिंह, रमनदीप सिंह, सुनिल नारायण, अनुकुल रोय, नवदीप सैनी, वैभव अरोरा, कार्तिक त्यागि र ब्लेसिंग मुजराबानी ।

लखनऊ सुपर जायन्ट्स:  ऋषभ पन्त (कप्तान), मिचेल मार्श, एडेन मार्क्रम, निकोलस पूरन, आयुष बडोनी, अब्दुल समद, मुकुल चौधरी, एम सिद्धार्थ, आवेश खान, मोहम्मद शमी, दिग्वेष राठी र प्रिन्स यादव ।

Read More

काठमाडौँ । युइएफए च्याम्पियन्स लिगको क्वाटरफाइनलमा एटलेटिको म्याड्रिडले बार्सिलोनामाथि अग्रता लिएको छ ।

गएराती बार्सिलोनाको घरेलु मैदानमा सम्पन्न क्वाटरफाइनलको पहिलो लिगमा एटलेटिको म्याड्रिडले २-० को जित हासिल गरेको हो ।

एटलेटिको म्याड्रिडको जितमा जुलियन अल्भारेज र एलेक्जेन्डर सोरलोथले एक एक गोल गरेका थिए । त्यस्तै यस खेलमा खेलको ४४औं मिनेटमा पाउ कुबार्सीले रातो कार्ड पाएपछि बार्सिलोना १० खेलाडीमा सिमित भएको थियो ।

अब क्वाटरफाइनलको दोस्रो लिग अप्रिल १५ मा एटलेटिको म्याड्रिडको घरेलु मैदानमा हुने छ ।

Read More

काठमाडौँ । गुजरात टाइटन्सले जारी आइपिएल अन्तर्गत दिल्ली क्यापिटल्सलाई पराजित गरेको छ । गएराती सम्पन्न खेलमा गुजरातले दिल्लीमाथि एक रनको रोमाञ्चक जित हासिल गरेको हो ।

गुजरातले दिएको २११ रनको लक्ष्य पछाएको दिल्लीले २० ओभरमा ८ विकेट गुमाउदै २०९ रन बनाएको थियो ।

दिल्लीका लागि केएल राहुलले ९२ रन बनाएका थिए भने डेभिड मिलर र पाथुम निसान्काले ४१-४१ रन बनाएका थिए ।त्यस्तै गुजरातका बलर राशिद खानले ३ विकेट लिए भने प्रसिद्ध कृष्णले २ विकेट लिएका थिए ।

यस अघि टस हारेर पहिला ब्याटिंग गरेको गुजरातले २० ओभरमा ४ विकेट गुमाउदै २१० रन बनाएको थियो । गुजरातका लागि शुभमन गिलले सर्बाधिक ७० रन बनाए भने वाशिंटन सुन्दरले ५५ र जोस बटलरले ५२ रन बनाएका थिए ।

यस अघि लगातार दुई खेलमा हार बेहोरेको गुजरातको यो पहिलो जित हो । त्यस्तै दिल्लीको तेस्रो खेलमा यो पहिलो हार हो ।

आइपिएल अन्तर्गत आज कोलकोता नाइट राइडर्स र लखनउ सुपर जाइन्टबीच खेल हुदैछ ।

Read More

काठमाडौँ । बंगलादेशको संसदले बुधबार कडा कानुन पारित गर्दै पूर्व प्रधानमन्त्री शेख हसिनाको पार्टी आवामी लिगमाथि लगाइएको प्रतिबन्धलाई कानुनी मान्यता दिएको छ । अब उक्त पार्टीलाई औपचारिक रूपमा प्रतिबन्धित संगठन घोषणा गरिएको छ ।

गृह मन्त्री सलाहुद्दीन अहमदले संसदमा विधेयक प्रस्तुत गर्दै यो कानुन ‘नरसंहार र आतङ्ककारी गतिविधिमा संलग्न’ संस्थामाथि कारबाहीका लागि ल्याइएको बताए । उनले प्रत्यक्ष रूपमा आवामी लिगको नाम नलिए पनि कानुन सोही पार्टी लक्षित रहेको स्पष्ट देखिएको छ । यो व्यवस्था यसअघि लागू गरिएको आतङ्कवादविरुद्धको ऐनमा संशोधन गरेर ल्याइएको हो ।

नयाँ कानुन लागू भएसँगै आवामी लिगको निर्वाचन आयोगमा रहेको दर्ता स्थायी रूपमा खारेज हुने भएको छ । अब पार्टीले चुनावमा भाग लिन पाउने छैन भने कुनै पनि राजनीतिक गतिविधि सञ्चालन गर्न पनि प्रतिबन्ध लगाइएको छ । साथै, पार्टीको समर्थनमा सामाजिक सञ्जाल वा सञ्चारमाध्यममा अभिव्यक्ति दिनु, जुलुस निकाल्नु वा भाषण गर्नु पनि अपराध मानिने व्यवस्था गरिएको छ ।

यस विधेयकको संसदभित्रैबाट समेत विरोध भएको छ । प्रमुख विपक्षी जमात–ए–इस्लामीका नेता शफीकुर रहमानले विधेयकमाथि थप छलफलका लागि समय माग गरेका थिए ।

प्रधानमन्त्री तारिक रहमान नेतृत्वको बंगलादेश नेशनालिष्ट पार्टी (बीएनपी) ले दुई तिहाई बहुमत ल्याएपछि आफ्नो पुरानो प्रतिद्वन्दी दल आवामी लिगमाथि प्रतिबन्ध लगाउने कानुन ल्याएको आरोप लगाइएको छ ।

अन्तर्राष्ट्रिय स्तरमा पनि यस कदमको आलोचना सुरु भएको छ । संयुक्त राष्ट्रका मानवअधिकार अधिकारीहरूले ठूलो राजनीतिक दललाई पूर्ण रूपमा प्रतिबन्ध लगाउनु लोकतन्त्रका लागि उपयुक्त नभएको टिप्पणी गरेका छन् । संवैधानिक विज्ञहरूले समेत यस्तो निर्णयले लोकतान्त्रिक प्रणालीमा नकारात्मक असर पार्न सक्ने बताएका छन् ।

यसैबीच, शेख हसिना हाल भारतमा शरण लिइरहेकी छन्। बंगलादेशको एक विशेष अदालतले उनको अनुपस्थितिमै मानवताविरुद्धको अपराधमा मृत्युदण्ड सुनाइसकेको छ । नयाँ सरकार बनेपछि पुराना सत्तासँग नजिक रहेका व्यक्तिमाथि पनि कारबाही तीव्र पारिएको छ । हालै पूर्व सभामुख शिरीन शर्मिन चौधरीलाई समेत हत्या प्रयासको आरोपमा पक्राउ गरिएको छ ।

Read More