पोखरा । म्याग्दी बेनी–दरबाङ सडक खण्ड पुर्ण रुपमा अवरुद्ध भएको छ ।
मंगलबार दिउसो म्याग्दीको मंगला गाउँपालिका- २ लामपाटा स्थित बेनी –दरबाङ सडक खण्डमा सडक माथिबाट ढुङगा माटो सहितको सुख्खा पहिरो आई सडक पुर्ण रुपमा अवरुद्ध भएको छ । प्रहरीले सडक खुलाउन समन्वय गरिरहेको जनाएको छ ।
काठमाडौँ । दोलखाको लापीलांग केन्द्रविन्दु भएर भूकम्प गएको छ ।
मंगलबार दिउसो ३: १३ बजे दोलखाको लापीलांग केन्द्रविन्दु भएर ४.१ रेक्टर स्केलको भूकम्प गएको राष्ट्रिय भूकम्प मापन तथा अनुसन्धान केन्द्रले जानकारी दिएको छ ।
काठमाडौँ । आज नेप्सेमा गिरावट आएको छ । आज मंगलबार नेप्से १९.८९ अंकले घटेर २७४१.९७ विन्दुमा पुगेर रोकिएको छ ।
आज ३२३ कम्पनिका एक करोड ५ लाख ३५ हजार ८७४ कित्ता शेयर ४ अर्ब ४३ करोड ८२ लाख ५१ हजार ८१२ मा कारोबार भएको थियो । आज सबै क्षेत्रको शेयरमा गिरावट आएको छ ।
आज सबै भन्दा बढी हिमस्टार उर्जाको शेयर ९.९८ प्रतिशतले बढेको छ भनेत्यस्तै आज उन्नति सहकार्य लघुवित्तको शेयर मुल्य सबैभन्दा बढी ७.४७ प्रतिशतले घटेको छ ।
त्यस्तै आज नेपाल रिइन्सुरेन्सको सबै भन्दा बढी २२ करोड ७० लाख बराबरको कारोबार भएको छ भने हिमालयन रिइन्सुरेन्सको २० करोड ११ लाख बराबरको कारोबार भएको नेप्सेले जनाएको छ ।
काठमाडौं । अवहेलना मुद्दामा नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठसँग सर्वोच्च अदालतले लिखित जवाफ माग गरेको छ । सर्वोच्चका न्यायाधीशद्वय तिलप्रसाद श्रेष्ठ र श्रीकान्त पौडेलको इजलासले श्रेष्ठसँग लिखित जवाफ माग गरेको हो ।
कानुनका विद्यार्थी आयुष दाहालले दायर गरेको रिटमा श्रेष्ठले सामाजिक सञ्जालमा लेखेको पोष्टले अदालतको अवहेलना भएको दाबि गरिएको छ ।
श्रेष्ठले भनसुन र घुस बिना अदालतबाट न्याय नपाउने भनी सामाजिक सञ्जालमार्फत् अदालतप्रति अनास्था फैलाउने खालको सामग्री पोस्ट गरेको निवेदकको दावी छ ।
माओवादी नेता श्रेष्ठले अहिले न्यायालयको स्थिति यस्तो छ कि न्यायका लागि अदालत पुग्ने कुनै पनि नेपालीले आफ्नो सम्पर्क पहुँचद्वारा न्यायाधीशलाई भन्न,भनाउन वा भनसुन गर्न सक्दैन भने वा घुस खुवाउन सक्दैन भने न्याय पाउला भनेर आशा गर्न सकिने स्थिति छैन भनेर लेखेका थिए।
पूर्वउपप्रधान एवं गृहमन्त्रीसमेत रहेका श्रेष्ठलाई न्याय प्रशासन न्याय प्रशासन ऐन, २०७३ को दफा १७९४० बमोजिम हदैसम्मको सजाय माग गरिएको छ ।
काठमाडौँ । सागर डिस्टिलरी लिमिटेडले भाद्र २५ गतेदेखि सर्वसाधारणका लागि आफ्नो प्रारम्भिक सार्वजनिक निष्कासन (आईपीओ) खुला गर्ने भएको छ । कम्पनीले प्रति युनिट १०० रुपैयाँको मूल्यमा ११ लाख ९० हजार ६४० कित्ता शेयर जारी गर्दैछ । आईपीओको आवेदन दिने अन्तिम मिति छिटोमा भाद्र २९ गते र ढिलोमा आश्विन ८ गतेसम्म हुनेछ ।
कम्पनीको जारी पूँजी ७२ करोड ६० लाखको २० प्रतिशत अर्थात १४ करोड ५२ लाख बराबरको १४ लाख ५२ हजार कित्ता शेयर जारी गर्न अनुमति पाएकोमा यसको १० प्रतिशत अर्थात् एक लाख ४५ हजार २०० इकाई शेयर यसअघि नै विदेशमा काम गर्ने नेपाली नागरिकहरूलाई बाँडफाँड गरिसकिएको छ । जसमा ३ प्रतिशत अर्थात् ४३ हजार ५६० इकाई, कम्पनीका कर्मचारीहरूका लागि छुट्याइएको छ र कुल प्रस्तावित शेयरको ५ प्रतिशत अर्थात् ७२ हजार ६०० इकाई, म्युचुअल फन्डहरूको लागि छुट्याइएको छ । यसबाट बाँकी रहेको ११ लाख ९० हजार ६४० इकाई शेयर सर्वसाधारणका खोल्न लागिएको हो ।
मुक्तिनाथ क्यापिटल लिमिटेडलाई आईपीओ निष्कासनको लागि निष्कासन प्रबन्धकको रूपमा नियुक्त गरिएको छ । शेयर आवेदन दिदा न्यूनतम १० इकाई र अधिकतम १० हजार इकाईका लागि आवेदन दिन सकिन्छ ।
इन्फोमेरिक्स क्रेडिट रेटिङ नेपाल लिमिटेड (इन्फोमेरिक्स नेपाल) ले बि प्लस रेटिंग तोकेको छ । यो मूल्याङ्कन भएका संस्थाहरूलाई समयमै आफ्नो वित्तीय दायित्व पूरा गर्न डिफल्टको उच्च जोखिम बोक्ने मानिन्छ ।
२०१४ मा स्थापित र मे २१, २०२३ मा सार्वजनिक लिमिटेड कम्पनीमा रूपान्तरण भएको सागर डिस्टिलरी लिमिटेडले भोड्का, ह्विस्की र जिन जस्ता मदिरा उत्पादन गरिरहेको छ । ५० लाख लिटरको वार्षिक उत्पादन क्षमता भएको कम्पनिका उत्पादनहरूमा लालीपप (विभिन्न स्वादहरू), रोयल ब्लू, ग्रे वुल्फ, बेरी र ब्लूज, र नेप्से बुल्स जस्ता रहेका छन् । कम्पनीमा सन्दीप जालानको १७.४८ प्रतिशत, आशुतोष खेतानको १९.०८ प्रतिशत र सुश्री अलका गोयलको १५.१० प्रतिशत शेयर रहेको छ ।
काठमाडौँ । नेकपा एकीकृत समाजवादीको लुम्बिनी प्रदेश सम्पर्क कमिटीको ऐतिहासिक प्रथम अधिवेशन सम्पन्न भएको छ । सम्मेलनले मिन प्रसाद गिरीको अध्यक्षतामा नयाँ कार्य समिति गठन गरेको छ ।
समितिको उपाध्यक्षमा लुना रिजाल र जनक विश्वकर्मा सचिव ओमबहादुर पुन उपसचिव सन्सृत अर्याल रहेका छन् ।
एकीकृत समाजवादीका अध्यक्ष माधवकुमार नेपालको प्रमुख आथिथ्यतामा सम्पन्न कार्यक्रममा पार्टीका केन्द्रीय सचिव सोम प्रसाद पाण्डे, पोलिट्ब्यूरो सदस्य विजय गुरुङ, संघीय सम्पर्क कमिटी इन्चार्ज, पोलिट्ब्युरो सदस्य लक्ष्मण के.सी,सह–इन्चार्ज, केन्द्रीय सदस्य बिरबल काजी राई, सङ्घीय सम्पर्क कमिटीका अध्यक्ष तारानाथ दाहाल,केन्द्रीय सदस्यहरु कल्पना माण्डव्य, नवराज तिमिल्सिना, प्रमेश पोखरेल, संघीय सम्पर्क कमिटीका पदाधिकारी सहितका नेताहरुको उपस्थिति थियो ।
बुटवल । रुपन्देही- ३ मा कार्तिक १७ गते हुने उपनिर्वाचनमा सिके राउत नेतृत्वको जनमत पार्टीले धनीराम चौधरीलाई उम्मेदवार बनाउने भएको छ ।
नागरिक उन्मुक्ति पार्टीका केन्द्रीय सदस्य एवं पूर्व जिल्ला इन्चार्ज रहेका चौधरी केही दिनअघि नाउपा छाडेर जनमत पार्टीमा प्रवेश गरेका थिए । पार्टी प्रवेशसँगै जनमतले चौधरीलाई उम्मेदवार बनाएको हो ।
चौधरीले यस अघि ०७९ को निर्वाचनमा उनी नागरिक उन्मुक्ति पार्टीबाट रुपन्देही–१ मा प्रतिनिधिसभा सदस्यको उम्मेदवारको रुपमा होमिदा १३ हजार ९६२ मत प्राप्त गरी चौथो स्थानमा रहेका थिए । रुपन्देहीको थारु समुदायमा चौधरीको विशेष पकड रहेको मानिन्छ ।
काठमाडौं । उपप्रधानमन्त्री एवं अर्थमन्त्री विष्णुप्रसाद पौडेल र विश्व बैंकका दक्षिण एशिया क्षेत्र हेर्ने उपाध्यक्ष जोहानेस जुटबीच भेटवार्ता भेटघाट भएको छ ।
अर्थ मन्त्रालयमा भएको भेटमा अर्थतन्त्र, शहरी भौतिक पूर्वाधार, लगानी, पर्यटन, वातावरण लगायतका विषयमा छलफल भएको छ । अर्थमन्त्री पौडेलले गत वर्षको तुलनामा अर्थतन्त्रका सुचकहरुमा उल्लेखनीय सुधार आएको जानकारी दिँदै नेपालले नीतिगत, संरचनागत, निर्णय र कार्यान्वयन प्रकृयामा सुधार गरेको बताए ।
उनले विश्व बैंकले आगामी ६ वर्षका लागि तयार पारेको कन्ट्री पार्टनरसीप फ्रेमवर्क नेपालमा विकासको आवश्यकता र सरकारको प्राथमिकतासँग तादम्य रहेको उल्लेख गर्दै फ्रेमवर्क अनुसारका आयोजना तथा कार्यक्रम तर्जुमा गर्न सरकार विश्व बैंकसँग मिलेर काम गर्न चाहेको बताए ।
अर्थमन्त्री पौडेलले वैकल्पिक विकास वित्त परिचालन विधेयक प्रतिनिधिसभाबाट पारित भइ राष्ट्रिय सभामा छलफलमा रहेको जानकारी गराउँदै विधेयक पारित भएसँगै निजी क्षेत्रसँग मिलेर प्रतिफल दिने आयोजनाहरुमा लगानी गर्ने बताए । उनले विधेयकको लक्ष्य अनुसार अघि बढ्न विश्व बैंकबाट सहयोगको अपेक्षा गरे ।
विश्व बैंकका दक्षिण एशिया क्षेत्र हेर्ने उपाध्यक्ष जुटले नेपालमा उच्च आर्थिक वृद्धिदर हुने गरी विश्व बैंकले सहयोग गर्ने बताए । उनले विश्व बैंकले लुम्बिनी, काठमाडौं उपत्यकाको शहरी पूर्वधार, वातावरणीय प्रदुषण न्यूनीकरण र आर्थिक वृद्धिका लागि सहयोग गर्ने भन्दै निजी क्षेत्रलाई पनि साथमा लिएर अघि बढ्नु पर्ने धारणा व्यक्त गरे ।
उपाध्यक्ष जुटले नेपालको अर्थतन्त्रका परिसूचकहरु सुधार हुनु सकारात्मक भएको उल्लेख गर्दै नेपालका लागि लगानी अझ बढाउन जरुरी भएको बताए । उनले वैकल्पिक विकास वित्त परिचानन सम्बन्धी कानून बनेसँगै पूर्वाधार क्षेत्रमा लगानीका लागि थप नयाँ क्षेत्रहरु पहिचान हुन सक्ने विश्वास व्यक्त गर्दै निजी क्षेत्रको लगानी आकर्षित गर्न र आर्थिक वृद्धिका लागि महत्वपूर्ण भूमिका निर्वाह गर्न सहयोग पुर्याउने बताए । उनले लगानी र उत्पादकत्व वृद्धिमा केन्द्रित हुन पनि सुझाव दिएका थिए ।
विराटनगर । सप्तकोशी नदीमा पानीको सतह बढेको छ ।
मंगलबार बिहान कोशी ब्यारेजमा पानीको प्रवाह प्रतिसेकेन्ड २ लाख ५६ हजार ८६५ क्युसेक पुगेको छ । त्यसपछि कोशी ब्यारेजका ५६ ढोकामध्ये अहिले ३४ ढोका खोलिएको जानकारी दिइएको छ ।
सप्तकोशी जलमापन केन्द्रले कोशी ब्यारेजमा हाल एक लाख ५० हजार क्युसेक बहाव हुनेबित्तिकै खतराको सूचक भन्दै रातो झन्डा र बत्ती बाल्ने गरिएको छ ।
काठमाडौं । नेपाली बजारमा आज सुनको मुल्य आज पनि बढेको छ ।
नेपाल सुनचाँदी व्यवसायी महासङ्घका अनुसार आइतबार छापावाल सुन तोलाको ६ सयले बढेर तोलाको २ लाख ५ हजार ९ सयमा कारोबार भइरहेको छ । यसअघि सोमबार सुनको मुल्य तोलाको २ लाख ५ हजार ३ सयमा कारोबार भएको थियो । यो सुनको अहिलेसम्मकै उच्च मुल्य हो ।
यस्तै, आज चाँदीको मूल्य पनि बढेको छ । महासङ्घका अनुसार आज चाँदी तोलाको १५ रुपैयाँले बढेर २४८५ रुपैयाँमा कारोबार भइरहेको छ । यसअघि सोमबार चाँदी तोलाको २४७० मा कारोबार भएको थियो ।