काठमाडौँ । जापानी पूर्व प्रधानमन्त्री शिन्जो आबेको हत्या गरेको अभियोग लागेका व्यक्तिले अदालतमा आफ्नो दोष स्वीकार गरेका छन् । तीन वर्षअघि आबेको दिनदहाडै हत्या गरिएको थियो । उक्त हत्याले सम्पूर्ण विश्वलाई स्तब्ध बनाएको थियो ।
अभियुक्त ४५ वर्षीय तेत्सुया यामागामीलाई हत्या र हतियार नियन्त्रण कानून उल्लङ्घनको आरोप लगाइएको थियो । जुलाई २०२२ मा भाषण दिइरहेको बेला आबेको हत्या गर्न हस्तनिर्मित हतियार प्रयोग गरेको आरोप लगाइएको छ । यामागामीले अदालतमा आफुले आबेको हत्या गरेको सत्य भएको बताएका छन् ।
यामागामीलाई २०२२ को चुनावी भाषणको क्रममा आबेलाई हस्तनिर्मित बन्दुकले गोली हानेको आरोप लगाइएको छ । उनले कोरियाली युद्धको एक वर्षपछि १९५३ मा दक्षिण कोरियामा गठन भएको एकीकरण चर्चसँग रिसाएका कारण आबेलाई आक्रमण गरेको बताएका छन् । यामागामी विश्वास गर्थे, यो चर्चको आबे र अन्य जापानी नेताहरूसँग घनिष्ठ सम्बन्ध छ । उनले अधिकारीहरूलाई भने, उनकी आमाले चर्चलाई ठूलो रकम दान गरेकी थिइन्, जसले गर्दा उनको परिवार आर्थिक रूपमा बर्बाद भएको थियो ।
एकीकरण चर्चको विश्वव्यापी रूपमा बलियो राजनीतिक सम्बन्ध छ। यसले जापानमा सयौं मुद्दाहरूको सामना गरेको छ । धेरै परिवारहरूले आरोप लगाउँछन्, चर्चले मानिसहरूलाई आफ्नो बचत दान गर्न प्रभावित गरेको थियो । यद्यपि, दशकौंसम्म, चर्च सरकारी छानबिनबाट धेरै हदसम्म अक्षुण्ण रह्यो र जापानको सत्तारूढ लिबरल डेमोक्रेटिक पार्टीसँग घनिष्ठ सम्बन्ध कायम राख्यो ।
आबे जापानमा २००६ देखि २००७ सम्म र २०१२ देखि २०२० सम्म जापानको प्रधानमन्त्री बनेका थिए ।
