काठमाडौँ । प्रधानमन्त्री केपी शर्मा ओलीको पाँचदिने चीन भ्रमणले अन्तरराष्ट्रिय क्षेत्रमा नेपालको प्रतिष्ठा अभिवृद्धि गर्न उल्लेखनीय योगदान पुर्याएको परराष्ट्र मन्त्रालयले जनाएको छ । जनवादी गणतन्त्र चीनका राष्ट्रपति सी चिनफिङको मैत्रीपूर्ण निमन्त्रणामा भदौ १४ गतेदेखि सुरु भएको भ्रमण भदौ १८ गते सम्पन्न भएको हो ।
त्रिभुवन अन्तरराष्ट्रिय विमानस्थलको अतिविशिष्ट कक्षमा पत्रकारसँग कुरा गर्दै परराष्ट्र सचिव अमृतबहादुर राईले भ्रमणका उपलब्धिहरूबारे जानकारी दिँदै यसले नेपाल–चीन सम्बन्धलाई नयाँ उचाइमा पुर्याएको बताए । भ्रमणका क्रममा प्रधानमन्त्री ओलीले चिनियाँ राष्ट्रपति सी, उपराष्ट्रपतिसहित अन्य मुलुकका राष्ट्र तथा सरकार प्रमुखसँग उच्चस्तरीय भेटवार्ता गरेका थिए ।
प्रधानमन्त्री ओलीको भ्रमणको मुख्य उद्देश्य चीनको थियानजिनमा आयोजित शाङ्घाई सहयोग संगठन (एससिओ) शिखर सम्मेलनमा सहभागी भई नेपालको सहभागिता स्तर अभिवृद्धि गर्ने र राष्ट्रिय हित प्रवर्द्धन गर्ने रहेको थियो । उनले सम्मेलनलाई सम्बोधन गर्दै बहुपक्षीयता सुदृढीकरण, क्षेत्रीय सहयोग प्रवर्द्धन र दिगो विकासका विषयमा विचार प्रस्तुत गरे ।
भ्रमणका क्रममा ओलीले चीनका राष्ट्रपतिसँग द्विपक्षीय सम्बन्धबारे खुला र सकारात्मक छलफल गरेका थिए । उनले बेल्ट एन्ड रोड इनिसिएटिभ (बिआरआई) अन्तर्गतका परियोजनाको शीघ्र कार्यान्वयन, रासायनिक मल आपूर्ति, पेट्रोलियम अन्वेषण, मानव संसाधन विकास, जलवायु परिवर्तनसँग जुध्ने क्षमता अभिवृद्धि र जनस्तरको सम्बन्ध सुदृढीकरणमा सहयोगका लागि आग्रह गरेका थिए । साथै, भारत–चीनबीच लिपुलेक नाकामार्ग सम्बन्धी समझदारीप्रति आपत्ति जनाउँदै उक्त समझदारी कार्यान्वयन नगर्न आग्रह गरे ।
यसैबीच, ओलीले रुसी राष्ट्रपति भ्लादिमिर पुटिनसहित विभिन्न मुलुकका नेताहरूसँग छुट्टाछुट्टै भेटवार्ता गर्दै व्यापार, लगानी, शिक्षा, संस्कृति, हवाई सम्पर्कलगायत क्षेत्रमा सहकार्यबारे छलफल गरेका थिए । उनले रुसी राष्ट्रपतिलाई नेपाल भ्रमणको निमन्त्रणा पनि दिए ।
भ्रमण क्रममा ओलीले थियानजिनस्थित धान अनुसन्धान क्षेत्र, चाउ एनलाई र डेंग यिङ्चाओ स्मारक संग्रहालयलगायत स्थलको अवलोकन गरे । बेइजिङमा उनले उपराष्ट्रपति हान चङ्गसँग भेटवार्ता गरी नेपाल–चीन सम्बन्धलाई अझ सुदृढ बनाउन छलफल गरे । साथै, उनले चीनको ८०औँ विजयोत्सव र विशेष सैनिक परेडमा पनि सहभागिता जनाए ।
प्रधानमन्त्री ओलीसँगै उनकी पत्नी राधिका शाक्य, पूर्वउपप्रधानमन्त्री पूर्णबहादुर खड्का, मन्त्रीहरू, सांसदहरू तथा उच्चपदस्थ कर्मचारीहरू समेत भ्रमणमा सहभागी थिए । परराष्ट्र मन्त्रालयले भ्रमणलाई नेपालको राष्ट्रिय हित, कूटनीतिक प्रभावकारिता र अन्तर्राष्ट्रिय प्रतिष्ठामा अभिवृद्धि गर्ने महत्वपूर्ण कदमका रूपमा लिएको छ ।
