काठमाडौँ । गरिमा विकास बैंक लिमिटेडले डिजिटल बैंकिङ सेवामा थप कदम चालेको छ। बैंकले फोनपे नेटवर्कसँगको सहकार्यमा आफ्नै मोबाईल बैंकिङ एप “गरिमा डिजि बटुवा” मार्फत भर्चुअल क्रेडिट कार्ड सेवा औपचारिक रूपमा सुरु गरेको छ।
बैंकका अनुसार, इच्छुक ग्राहकले नजिकको शाखा कार्यालयमा गई फारम भरेपछि आफ्नै मोबाईल एपमार्फत भर्चुअल क्रेडिट कार्ड सक्रिय गर्न सक्नेछन्। यस कार्डमार्फत फोनपे नेटवर्कमा रहेका कुनै पनि क्युआर कोडमार्फत सजिलै भुक्तानी गर्न सकिने सुविधा हुनेछ।
भर्चुअल क्रेडिट कार्डको न्यूनतम क्रेडिट सीमा रु. १० हजार र अधिकतम रु. १ लाख रहनेछ। भुक्तानीका लागि ग्राहकले अधिकतम ४५ दिनसम्म बिना ब्याज रकम प्रयोग गर्न सक्नेछन्। साथै, हिसाब राफसाफ गर्दा १० प्रतिशत वा पुरै १०० प्रतिशत रकम भुक्तानी गर्ने विकल्प पनि उपलब्ध हुनेछ।
गरिमा विकास बैंकले यस सेवा भौतिक कार्ड नभई मोबाइल एपमार्फत भर्चुअल रूपमा उपलब्ध हुने भएकाले यो सुविधा थप सुरक्षित र सहज हुने विश्वास व्यक्त गरेको छ। बैंकले यसलाई नविनतम डिजिटल अनुभवका रूपमा प्रस्तुत गरेको छ।
हाल बैंकले देशभर १२५ शाखा, १ एक्सटेन्सन काउण्टर र ५१ एटिएममार्फत ग्राहकलाई सेवा दिइरहेको छ। साथै, डिजिटल बैंकिङमार्फत सरल, सुरक्षित र गुणस्तरीय सेवा प्रवाह गर्दै आएको बैंकले बताएको छ।
