काठमाडौँ । नागरिक समाजका अगुवा डा. सुन्दरमणि दीक्षितले सर्वोच्च अदालतले संसद् पूनःस्थापना गर्ने बताएका छन् ।
नेपाली रेडियो नेटवर्कको कार्य्रक्रममा बोल्दै डा. दीक्षितले भने–‘सुप्रिम कोर्टलाई अर्को उपाय नै छैन, उसले संसद् व्युँताउनैपर्छ, उसले टेक्नुपर्छ संविधानलाई नै, यो सरकार नै संविधान टेकेर आएको हो । यो सरकार त जेनजी क्रान्तिको आडमा आएको रहेनछ । त्यो त पक्का बुझियो । राष्ट्रपतिले पनि त्यही घोषणा गर्नुभएको छ, संविधान चलाएको छैन । मैले संविधान बिगारेको छैन भनेर राष्ट्रपतिले भन्नुभएको छ ।’
राष्ट्रपति रामचन्द्र पौडेल र सुशीला कार्कीले जेनजी रिभोलुसनलाई खत्तमै पारेको उनको आरोप छ । उनले भने,‘यहाँ त के भयो भने पूरानै संसद्, पूरानै व्यवस्था अनि पूरानै संविधान । पूरानै खालको इलेक्शन, उही सांसद चुन्ने, व्यवस्था उही हो । घुम्ने मेचमाथि अन्धो मान्छेझैं भयो ।’ राष्ट्रपति पौडेलले नै संसद् पूनःस्थापनाको लागि सर्वोच्च अदालतलाई एकप्रकारले मौका दिएको उनको टिप्पणी छ ।
राष्ट्रपति पौडेल कांग्रेसी र सुशीला कार्कीपनि भित्री मनमा काँग्रेसी नै भएकोले उनीहरुले अहिलेको जेनजी आन्दोलनपछि षड्यन्त्र गरेको दीक्षितको आरोप छ । उनले भने,‘यिनीहरुले जेनजीहरुको यत्रो अद्धितीय रिभोलुसनलाई खत्तम नै पारे । सर्वोच्च अदालतले संसद् पूनःस्थापना गर्छ । उसँग अर्को विकल्प नै छैन । त्यो मार्गदर्शन त राष्ट्रपति र सुशीला कार्कीले दिईसक्नुभएको छ ।’
