काठमाडौँ । नेपाली मूलका उद्यमी डा. समीर मास्केले स्थापना गरेको सूचना प्रविधिसम्बन्धी कम्पनी फ्युजमेसिन्स (Fusemachines) ले अमेरिकाको प्रतिष्ठित नास्डाक (NASDAQ) मा आफ्नो शेयर कारोबार सुरु गरेको छ। बिहीबारदेखि कम्पनीले ‘FUZ’ नामबाट शेयर कारोबार आरम्भ गरेको हो, जससँगै विश्वव्यापी बजारमा नेपालीको सहभागिता एक ऐतिहासिक उपलब्धिका रूपमा अंकित भएको छ।
दुई वर्षअघि अमेरिकी कम्पनी CSLM Acquisition Corp. सँग भएको ‘मर्जर’ प्रक्रिया सम्पन्न भएपछि फ्युजमेसिन्सले नास्डाक पुँजीबजारमा प्रवेश पाएको हो। कम्पनीका संस्थापक तथा प्रमुख कार्यकारी अधिकृत (CEO) डा. मास्केले भने, “नवीनतम सोच र प्रविधिमा विश्वास राख्दै सानो समूहबाट सुरु गरिएको यो यात्राले आज विश्व बजारमा प्रवेश गरेर नेपाली प्रतिभाको क्षमता प्रमाणित गरेको छ।”
डा. मास्केका अनुसार हाल कम्पनीमा ३५० कर्मचारी कार्यरत छन्, जसमा २६० जना नेपालमा नै काम गर्छन्। फ्युजमेसिन्स कृत्रिम बुद्धिमत्ता (AI) र डेटा विज्ञानमा आधारित प्रविधि समाधान विकासमा अग्रणी कम्पनी हो।
नास्डाकले जारी गरेको विज्ञप्तिमा फ्युजमेसिन्स र CSLM Acquisition बीचको मर्जर प्रक्रिया पूरा भइसकेको र बिहीबारदेखि कारोबार सुरु भएको उल्लेख छ। योसँगै कम्पनीले विश्वव्यापी लगानीकर्तालाई आकर्षित गर्ने नयाँ अवसरहरू खोलेको बताइएको छ।
नेपाल राष्ट्र बैंकका गभर्नर डा. विश्वनाथ पौडेलले फ्युजमेसिन्सको ऐतिहासिक उपलब्धिलाई बधाई दिएका छन्। नेपाल फर्कँदै गर्दा टाइम्स स्क्वायरमा डा. मास्केसँगको भेटपछि गभर्नर पौडेलले सामाजिक सञ्जालमा लेखेका छन्, ‘आज NASDAQ मा फ्युजमशिनको शेयर कारोबार सुरु भयो। संयोगले नेपाल फर्कँदै गर्दा फ्युजमशिनका संस्थापक डा. समीर मास्केसँग टाइम्स स्क्वायरमा भेट भयो। एक पायोनियरका रूपमा नेपालीहरूले डा. मास्केलाई सधैं सम्मान गर्नेछन्।’
कम्पनीको Chief Financial Officer (CFO) मा क्रिस्टिन च्याम्बर्स र सञ्चालक समितिमा समीर मास्के, भरत क्रिस, टिम गोचर, सञ्जय श्रेष्ठ र सलमान आलम रहेका छन्।
फ्युजमेसिन्सको नास्डाक सूचीकृत हुनु नेपालका प्रविधि उद्यमीहरूको लागि प्रेरणादायी कदमका रूपमा हेरिएको छ। यो उपलब्धिले अन्तर्राष्ट्रिय बजारमा नेपाली प्रविधि र नवप्रवर्तनको पहिचानलाई थप सुदृढ बनाएको विश्लेषण गरिएको छ।
