काठमाडौं । चितवनको सौराहास्थित होटेल पार्क ल्यान्ड र भक्तपुरको नगरकोट रिसोर्ट लिमिटेडले सर्वसाधारणका लागि प्राथमिक सेयर (आईपीओ) निष्कासन गर्ने तयारी अघि बढाएका छन् ।
होटेल पार्क ल्यान्ड लिमिटेडले आईपीओ निष्कासन तथा बिक्री व्यवस्थापनका लागि सिटिजन्स क्यापिटल लिमिटेडलाई नियुक्त गरेको छ। यससम्बन्धी सम्झौतामा होटेल पार्क ल्यान्डका अध्यक्ष शरदकुमार पाण्डे र सिटिजन्स क्यापिटलका प्रमुख कार्यकारी अधिकृत सबिर बादे श्रेष्ठले हस्ताक्षर गरेका छन्।
सम्झौताअनुसार नेपाल धितोपत्र बोर्डबाट स्वीकृति प्राप्त भएपछि सिटिजन्स क्यापिटलले होटेल पार्क ल्यान्डको साधारण सेयर सार्वजनिक निष्कासन र बिक्री व्यवस्थापनको सम्पूर्ण प्रक्रिया अघि बढाउनेछ।
यता, भक्तपुरको लोकप्रिय पर्यटकीय गन्तव्य नगरकोटमा अवस्थित नगरकोट रिसोर्ट लिमिटेडले पनि सेयर बजारमा प्रवेश गर्ने तयारी गरेको छ। कम्पनीले १५ करोड रुपैयाँ बराबरको साधारण सेयर निष्कासनका लागि एनएमबी क्यापिटल लिमिटेडलाई धितोपत्र निष्कासन तथा बिक्री प्रबन्धकका रूपमा नियुक्त गरेको छ।
नगरकोट रिसोर्टको कर्पोरेट परामर्शसम्बन्धी कार्य भने ज्योति क्यापिटल लिमिटेडले गर्दै आएको जानकारी दिइएको छ।
पर्यटन व्यवसायमा सक्रिय यी दुई कम्पनीको आईपीओ तयारीले सेयर बजारमा नयाँ लगानी अवसर थपिने अपेक्षा गरिएको छ। साथै, पर्यटन क्षेत्रका कम्पनीहरू पूँजी बजारमार्फत विस्तारतर्फ उन्मुख हुँदै जानुले यस क्षेत्रको संस्थागत विकासमा समेत सकारात्मक सन्देश जाने विश्लेषण गरिएको छ।
