काठमाडौं । राष्ट्रिय स्वतन्त्र पार्टी (रास्वपा) र काठमाडौं महानगरपालिकाका मेयर बालेन साहबीच एकता सहमति सार्वजनिक भएसँगै राजधानीको राजनीतिमा नयाँ हलचल देखिएको छ।
यही घटनाक्रमबीच पूर्व रेडियोकर्मी हरिशरण लामिछानेले काठमाडौं महानगरको मेयर पदमा स्वतन्त्र उम्मेदवारी दिने घोषणा गरेका छन्।
हरिशरण लामिछाने रास्वपा सभापति रवि लामिछानेका दाइ हुन्। उनले रवि लामिछाने र बालेन शाहबीच भएको राजनीतिक सहकार्यलाई सकारात्मक रूपमा लिँदै, त्यसप्रति आफ्नो खुसीसमेत व्यक्त गरेका छन्। यही परिवेशमा उनले आगामी निर्वाचनमा काठमाडाैंको नेतृत्व गर्ने आकांक्षा सार्वजनिक गरेका हुन्।
उनका अनुसार राजधानीलाई नयाँ सोच, पारदर्शी नेतृत्व र जनमुखी कार्यशैली आवश्यक छ। बालेन–रवि सहमतिले वैकल्पिक राजनीतिप्रति नागरिकको चासो बढाएको भन्दै आफूले पनि त्यो यात्रामा सहभागी हुने निर्णय गरेको उनले बताएका छन्।
यसअघि पार्टीभित्र परिवारवादको आरोप नलागोस् भन्ने उद्देश्यले रवि लामिछानेले आफन्तलाई राजनीतिक रूपमा अघि नबढाउने नीति लिएको चर्चा हुँदै आएको थियो। यही कारणले आफ्नो राजनीतिक सम्भावना सीमित भएको अनुभूति गर्दै आएका हरिशरण लामिछाने यस विषयमा लामो समयदेखि असन्तुष्ट रहँदै आएका थिए।
बालेन र रास्वपाबीचको एकतापछि काठमाडाैंको मेयर पदको प्रतिस्पर्धा थप रोचक बन्ने संकेत देखिएको छ। हरिशरण लामिछानेको उम्मेदवारी घोषणाले राजधानीको स्थानीय राजनीति आगामी दिनमा अझै बहसको केन्द्रमा रहने देखिन्छ।
