काठमाडौँ । अमेरिका, इजरायल र इरानबीच जारी युद्ध नवौँ दिनमा पुगेको छ । यसबीच इरानी सेनाले फारस खाडीमा अमेरिकी जहाज प्रवेश गरे समुद्रमै डुबाइदिने चेतावनी दिएको छ ।
इरानको यस्तो चेतावनी अमेरिकी राष्ट्रपति डोनाल्ड ट्रम्पले हालै अमेरिकी नौसेनाले तेल बोकेका ट्यांकरको सुरक्षाका लागि फारस खाडीमा जहाज पठाउन सक्ने बताएका केही समयपछि आएको हो । ती ट्यांकरहरू प्रायः हर्मुज जलडमरूमध्य हुँदै आवतजावत गर्ने गर्छन् ।
यसैबीच राष्ट्रपति ट्रम्पले तीन दिनभित्र अमेरिकाले इरानका ४२ नौसैनिक युद्धपोत नष्ट गरेको दाबी गरेका छन् । उनका अनुसार यस आक्रमणपछि ईरानको नौसैनिक शक्ति लगभग समाप्तजस्तै भएको छ । उनले अमेरिकी आक्रमणका कारण ईरानको वायुसेना र सञ्चार प्रणालीमा पनि ठूलो क्षति पुगेको बताएका छन् ।
उता इजरायली सेनाले अहिलेसम्म ईरानका १६ सैनिक विमान खसालिएको दाबी गरेको अल जजीराले जनाएको छ ।
ईरानको रेड क्रिसेन्ट सोसाइटीका अनुसार युद्धका क्रममा अहिलेसम्म ईरानका ६ हजार ६६८ नागरिक क्षेत्रलाई निशाना बनाइएको छ । ती आक्रमणमा ५ हजार ५३५ घर र १ हजार ४१ पसल क्षतिग्रस्त भएका छन् । साथै १४ स्वास्थ्य केन्द्र र ६५ विद्यालयमा पनि आक्रमण भएको जनाइएको छ ।
उक्त संस्थाका अनुसार युद्धका कारण अहिलेसम्म १ हजार ४८३ जनाको ज्यान गएको छ। रेड क्रिसेन्टका १३ केन्द्र पनि आक्रमणबाट प्रभावित भएका छन्। यता इस्राइलमा भने युद्धका क्रममा १ हजार ७६५ जना घाइते भएका बताइएको छ ।
यसैबीच अमेरिकी राष्ट्रपति ट्रम्पले सामाजिक सञ्जालमार्फत ईरान छिमेकी देशहरूसामु झुकेको दाबी गरेका छन् । उनले ईरानले छिमेकी राष्ट्रसँग माफी माग्दै अब उनीहरूमाथि आक्रमण नगर्ने प्रतिबद्धता जनाएको बताएका छन् ।
ट्रम्पका अनुसार अमेरिका र इस्राइलका निरन्तर आक्रमणका कारण परेको दबाबले यस्तो अवस्था सिर्जना भएको हो। उनले अहिले ईरान मध्यपूर्वको प्रभावशाली शक्ति नभई कमजोर अवस्थामा पुगेको टिप्पणी गरेका छन् ।
यता इरानी राष्ट्रपति मसुद पेजेशकियानले हालै छिमेकी देशहरूमाथि भएको आक्रमणप्रति दुःख व्यक्त गर्दै माफी मागेका थिए । उनले ती देशको भूमिबाट ईरानमाथि आक्रमण नभएसम्म आफूहरूले छिमेकी राष्ट्रलाई लक्षित गरी आक्रमण नगर्ने बताएका छन् ।
Read More
