काठमाडौँ । प्रतिनिधिसभा निर्वाचन २०८२ अन्तर्गत धादिङ-१ बाट राष्ट्रिय स्वतन्त्र पार्टी (रास्वपा)की उम्मेदवार आशिका तामाङ उल्लेखनीय मतान्तरसहित निर्वाचित भएकी छन्। चुनावी अभियानका क्रममा कुखुरा र बाख्रासँग भोट मागेको भिडियो सामाजिक सञ्जालमा भाइरल भई ट्रोलसमेत बनेकी उनी अन्ततः ठूलो अन्तरले विजयी भएकी हुन्।
सार्वजनिक मतपरिणाम अनुसार तामाङले ३९ हजार १२८ मत प्राप्त गर्दै आफ्नो निकटतम प्रतिस्पर्धी नेकपा (एमाले)का भुमिप्रसाद त्रिपाठी लाई २४ हजार ९६ मतान्तरले पराजित गरिन्। त्रिपाठीले १५ हजार ३२ मत प्राप्त गरेका छन्।
यसै क्षेत्रमा नेपाली कम्युनिष्ट पार्टीका उम्मेदवार राजेन्द्रप्रसाद पाण्डे तेस्रो स्थानमा रहे। आठ पटकसम्म चुनावी मैदानमा उत्रिएका उनले १४ हजार ७०७ मत प्राप्त गरे।
त्यस्तै नेपाली कांग्रेसका कृष्ण रिजाल १० हजार ८० मतसहित चौथो स्थानमा सीमित भएका छन्।
धादिङ-१ को परिणामले नयाँ पुस्ताका उम्मेदवारप्रति मतदाताको आकर्षण देखिएको विश्लेषण गर्न थालिएको छ।
