काठमाडौँ । कम्बोडियामा अलपत्र परेका ५१ जना नेपालीको उद्दार गरिएको छ । विभिन्न व्यक्तिको प्रलोभनमा परेर त्यहाँ पुगेका उनीहरूलाई अनलाइन ठगी केन्द्र, क्यासिनो तथा अन्य गैरकानुनी काममा लगाइएको थियो ।
नेपाली राजदूतावास बैंकक को पहल र कम्बोडिया सरकारको सहयोगमा उनीहरूको उद्दार गरिएको हो । गैरआवासीय नेपाली संघ कम्बोडियाको सहजीकरणमा उनीहरूलाई चैत्र १० गते कम्बोडियाबाट उडाएर चैत्र ११ गते त्रिभुवन अन्तर्राष्ट्रिय विमानस्थलमा ल्याइएको हो ।
राजदूतावासका अनुसार कम्बोडियामा अझै पनि केही नेपाली अलपत्र अवस्थामा रहेका छन् । उनीहरूलाई पनि नेपाल फर्काउने प्रक्रिया अघि बढाइएको छ ।
कम्बोडियामा नेपालीहरूलाई अनलाइन ठगी लगायत गैरकानुनी काममा लगाइएको र धेरैजना बिना भिसा वा भिसा अवधि सकिएपछि पनि बसिरहेको जानकारी प्राप्त भएको दूतावासले जनाएको छ । यस्तो अवस्थामा रहेका नेपालीलाई तत्काल सम्पर्कमा आउन आग्रह गरिएको छ ।
त्यहाँ काम गर्ने क्रममा धेरै नेपालीको राहदानी कम्पनीले जफत गरेको वा हराएको गुनासो आएको छ । यस्तो अवस्थामा नेपाल फर्कनका लागि राजदूतावासले निःशुल्क एकतर्फी यात्रा अनुमति पत्र उपलब्ध गराउने व्यवस्था रहेको जनाएको छ ।
पछिल्ला वर्षहरूमा कम्बोडिया जाने नेपालीको संख्या बढ्दो क्रममा रहेको देखिएको छ । सन् २०२१ मा १०१ जना पुगेका नेपाली सन् २०२५ सम्म आइपुग्दा ९ हजार ६७६ पुगेका छन् ।
राजदूतावासले वैदेशिक रोजगारीका लागि अनिवार्य रूपमा श्रम स्वीकृति लिएर मात्र जान र छिटो धेरै पैसा कमाउने लोभमा कम्बोडिया, लाओस, म्यानमार, थाइल्याण्डजस्ता देशमा भ्रमणको बहानामा नजान पुनः आग्रह गरेको छ । साथै, यसबारे जनचेतना फैलाउन सञ्चार माध्यम र नागरिक समाजलाई समेत सहयोग गर्न अपिल गरिएको छ ।
