काठमाडौँ । राष्ट्रिय योजना आयोगको उपाध्यक्षमा डा. गुणाकर भट्ट नियुक्त भएका छन् ।
मंगलबार बसेको मन्त्रिपरिषदको बैठकले भट्टलाई राष्ट्रिय योजना आयोगको उपाध्यक्षमा नियुक्त गर्ने निर्णय गरेको हो ।
मन्त्रिपरिषदका सदस्यको मर्यादाक्रम हेरफेर
एभरेष्ट न्यूज एजेन्सी,
काठमाडौँ । मन्त्रिपरिषदका सदस्यको मर्यादाक्रम हेरफेर गरिएको छ । प्रधानमन्त्री बालेन शाहको सिफारिसमा राष्ट्रपति रामचन्द्र पौडेलले मन्त्रीहरुको मर्यादाक्रम हेरफेर गरिएको हो ।
नयाँ मर्यादाक्रम अनुसार मन्त्रिपरिषद्को मर्यादाक्रमको तेस्रो स्थानमा यसअघि गृहमन्त्री सुदन गुरुङलाई राखिएकोमा अब परराष्ट्रमन्त्री शिशिर खनाललाई राखिएको छ । त्यस्तै चौथो स्थानमा उर्जमन्त्री विराजभक्त श्रेष्ठलाई राखिएको छ भने गृहमन्त्री गुरुङलाई पाँचौं स्थानमा राखिएको छ ।
त्यस्तै यसअघि पुछारमा रहेकी महिला मन्त्री सीता बादीलाई आठौ स्थानमा राखिएको छ भने श्रममन्त्री दिपक कुमार साहलाई १५औं स्थानमा राखिएको छ ।
परराष्ट्रमन्त्री खनालसँग चिनियाँ राजदुत माओमिङको भेटवार्ता
काठमाडौँ । परराष्ट्रमन्त्री शिशिर खनालसँग नेपालका लागि चिनियाँ राजदुत झाङ माओमिङले शिष्टाचार भेट गरेका छन् ।
मंगलबार बिहान परराष्ट्र मन्त्रालयमा भएको भेटमा राजदुत माओमिङले चिनियाँ विदेशमन्त्री वाङ यी को तर्फबाट मन्त्री खनाललाई पदभार ग्रहणको बधाई तथा शुभकामना सन्देश समेत हस्तान्तरण गरेका थिए ।
भेटका क्रममा नेपाल-चीन सम्बन्धलाई अझ सुदृढ बनाउने र आपसी हितमा आधारित सहकार्य विस्तार गर्ने विषयमा छलफल भएको परराष्ट्र मन्त्रालयले जनाएको छ ।
ठगी सम्बन्धी कसुर मुद्दाका फरार प्रतिवादी पक्राउ
काठमाडौं । ठगी सम्बन्धी कसुर मुद्दाका फरार प्रतिवादी काठमाडौं महानगरपालिका-१२ टेकु बस्ने धनुषा घर भएका ५१ वर्षीय जिवन कुमार ठाकुर र २७ वर्षीय निहाल ठाकुरलाई प्रहरीले पक्राउ गरेको छ ।
ठगी सम्बन्धी मुद्दामा फरार रहेका उनीहरूलाई काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले काठमाडौं महानरपालिका-३ बसुन्धाराबाट पक्राउ गरेको हो ।
उनीहरूमध्ये जिवन कुमारलाई आवश्यक अनुसन्धान तथा कारवाहीको लागि जिल्ला प्रहरी परिसर जावलाखेल पठाइएको छ भने निहाललाई प्रहरी वृत्त जनसेवा पठाइएको छ ।
डिसहोमको कर्मचारी भन्दै ठगी गर्ने तीन जना व्यक्ति पक्राउ
काठमाडौं । डिसहोमको कर्मचारी भन्दै ठगी गरेको अभियोगमा तीन जनालाई आइतबार प्रहरीले पक्राउ गरेको छ ।
पक्राउ पर्नेहरूमा काठमाडौं टोखा नगरपालिका-३ बस्ने धादिङ घर भएका २२ वर्षीया आरती सिंखडा, काठमाडौं टोखा नगरपालिका-३ बस्ने दोलखा घर भएका २२ वर्षीय विष्णु कार्की र काठमाडौं टोखा नगरपालिका-९ बस्ने रामेछाप घर भएका ४७ वर्षीय असल सिंह तामाङ रहेका छन् ।
काठमाडौंस्थित डिसहोमको कर्मचारी हुँ भनि डिसहोममा आबद्ध नियमित ग्राहकहरूलाई फोन सम्पर्क गरी केहि समयको लागि डिसहोमका ग्राहकहरूको लागि १ वर्षको रिचार्ज गर्दा ४ महिनाको निशुल्क रिचार्ज अफर आएको छ भनि ग्राहकहरूलाई झुक्यानमा पारी रकम लिई ठगी गरेको भन्ने उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले उक्त कार्यमा संलग्न उनीहरूलाई पक्राउ गरेको हो ।
उनीहरूलाई थप अनुसन्धान तथा आवश्यक कारबाहीको लागि जिल्ला प्रहरी परिसर काठमाडौं पठाइएको छ ।
मन्त्रिपरिषद्को बैठक शुरु
काठमाडौँ । प्रधानमन्त्री बालेन्द्र शाहले मन्त्रिपरिषद्को आकस्मिक बैठक शुरु भएको छ ।
बैठक केहीबेरअघि प्रधानमन्त्री तथा मन्त्रिपरिषद्को कार्यालय सिंहदरबारमा शुरु भएको प्रधानमन्त्रीको सचिवालयले जानकारी दिएको छ । बैठकका एजेन्डा बारेमा खुलाइएको छैन ।
इरानका नयाँ सर्वोच्च नेता गम्भीर बिरामी अवस्थामा उपचारत !
काठमाडौँ । इरानका नयाँ सर्वोच्च नेता मोजतबा खामेनी गम्भीर बिरामी अवस्थामा अस्पतालमा उपचाररत रहेको अन्तर्राष्ट्रिय सञ्चारमाध्यमले जनाएको छ ।
टाइम्सको एक रिपोर्ट अनुसार उनी बेहोस अवस्थामा रहेका छन् र हाल कुम सहरस्थित अस्पतालमा उपचार भइरहेको छ । उक्त जानकारी अमेरिकी र इजरायली गुप्तचर निकायले खाडी मुलुकहरूसँग साझा गरेको कूटनीतिक नोटलाई उद्धृत गर्दै सार्वजनिक गरिएको हो ।
रिपोर्टमा फेब्रुअरी २८ मा भएको हवाई आक्रमणमा उनी गम्भीर घाइते भएका थिए । सोही आक्रमणमा उनका पिता तथा इरानका पूर्व सर्वोच्च नेता अयातुल्ला अली खामेनीको मृत्यु भएको दाबी गरिएको छ ।
घाइते भएपछि मोजतबा खामेनेईको स्वास्थ्य अवस्था अत्यन्त गम्भीर रहेको र हाल देश सञ्चालन गर्न सक्ने अवस्थामा नरहेको उल्लेख गरिएको छ ।
उक्त नोटमा पहिलो पटक उनको अवस्थिति पनि खुलाइएको छ । उनी तेहरानबाट करिब ८७ माइल दक्षिणमा रहेको कुम सहरमा रहेका छन्, जुन शिया मुस्लिमका लागि पवित्र स्थल मानिन्छ ।
साथै, अमेरिकी र इजरायली गुप्तचर निकायलाई उनको अवस्थिति पहिले नै थाहा भए पनि अहिलेसम्म सार्वजनिक नगरिएको पनि रिपोर्टमा जनाइएको छ ।
मन्त्रिपरिषद्को आकस्मिक बैठक बोलाइयो
काठमाडौँ । प्रधानमन्त्री बालेन्द्र शाहले मन्त्रिपरिषद्को आकस्मिक बैठक बोलाएका छन् ।
प्रधानमन्त्री शाहले दिउँसो १ बजे बस्नेगरी बैठक बोलाएको प्रधानमन्त्रीको सचिवालयले जानकारी दिएको छ । बैठकका एजेन्डा बारेमा खुलाइएको छैन ।
इरानमा विद्युत् केन्द्र वरिपरि मानव श्रृंखला बनाउन आह्वान
काठमाडौँ । इरान सरकारले देशभरका नागरिकलाई विद्युत् केन्द्र वरिपरि मानव श्रृंखला बनाउन आह्वान गरेको छ ।
सरकारले विशेषगरी युवा, कलाकार र खेलाडीलाई लक्षित गर्दै अप्रिल ७ मा देशका विभिन्न विद्युत् उत्पादन केन्द्र नजिकै एकजुट हुन आग्रह गरेको हो । यसको उद्देश्य अमेरिकी आक्रमणबाट सार्वजनिक संरचनाको सुरक्षा गर्नु रहेको बताइएको छ ।
इरानका युवा तथा खेलकुद मामिलाका उपमन्त्री अलिरेजा रहीमीले सामाजिक सञ्जालमार्फत सबै नागरिकलाई हातेमालो गर्दै विरोध जनाउन आह्वान गरेका छन् । उनले सार्वजनिक संरचनामाथिको आक्रमण युद्ध अपराध भएको सन्देश दिन यस्तो कार्यक्रम आयोजना गर्न लागिएको बताएका छन् ।
सुनचाँदीको मुल्य बढ्यो, तोलाको कति पुग्यो ?
काठमाडौं । नेपाली बजारमा आज सुनचाँदीको मुल्य बढेको छ ।
नेपाल सुनचाँदी व्यवसायी महासङ्घका अनुसार मंगलबार छापावाल सुनको मुल्य तोलाको ४ सयले बढेर तोलाको २ लाख ९१ हजार ८ सयमा कारोबार भइरहेको छ । यसअघि सोमबार सुन तोलाको २ लाख ९१ हजार ४ सयमा कारोबार भएको थियो ।
यस्तै, आज चाँदीको मूल्य पनि बढेको छ । महासङ्घका अनुसार आज चाँदी तोलाको ४० रुपैयाँले बढेर ४८२० मा कारोबार भइरहेको छ । यसअघि सोमबार चाँदी तोलाको ४७८० मा कारोबार भएको थियो ।