तनहुँ । हिन्दू धर्मावलम्बीहरूको प्रमुख पर्व माघेसङ्क्रान्ति नजिकिँदै गर्दा त्रिशूली र कालीगण्डकी नदीको पवित्र सङ्गमस्थल देवघाटधाममा लाग्ने धार्मिक मेलाको सम्पूर्ण तयारी पूरा भएको छ ।
तनहुँ, चितवन र नवलपुरको सिमानामा अवस्थित यो ऐतिहासिक तीर्थस्थलमा माघेसङ्क्रान्तिका दिन हरेक वर्ष श्रद्धालुहरूको ठूलो भीड लाग्ने गर्दछ।
देवघाट क्षेत्र विकास समितिका कार्यकारी निर्देशक सदन बरालका अनुसार यस वर्षको माघेसङ्क्रान्ति मेलामा करिब तीन लाखभन्दा बढी भक्तजन सहभागी हुने अनुमान गरिएको छ। मेलालाई व्यवस्थित, सुरक्षित र सहज बनाउन आवश्यक पूर्वतयारी सम्पन्न भइसकेको उनले जानकारी दिए।
ज्योतिषीय मान्यताअनुसार सूर्य धनु राशीबाट मकर राशीमा प्रवेश गर्ने दिनलाई मकर सङ्क्रान्ति भनिन्छ। यस अवसरमा देवघाटधाममा स्नान, पूजा-अर्चना र दान गर्नाले विशेष धार्मिक पुण्य प्राप्त हुने जनविश्वास रहिआएको छ। माघ महिनाभर यहाँ स्नान गरेमा जीवनका पाप नष्ट हुने र मोक्ष प्राप्ति हुने धार्मिक मान्यता रहेको निर्देशक बरालले बताए। साथै, त्रिशूली र कालीगण्डकी नदीको सङ्गम पनि माघेसङ्क्रान्तिकै दिन भएको विश्वास गरिँदै आएको छ।
सवारी व्यवस्थापन र पार्किङको विशेष प्रबन्ध
मेलाका दिन सवारी चाप व्यवस्थापनका लागि विशेष रुट निर्धारण गरिएको छ। चितवनतर्फबाट आउने सवारीसाधन रामनगर हुँदै देवघाट, रामनगर-ठिमुरा हुँदै देवघाट वा दासढुङ्गा हुँदै देवघाट प्रवेश गर्नेछन् भने फर्कँदा देवघाट-बागेश्वरी-आँपटारी मार्ग प्रयोग गरिनेछ।
नवलपुरतर्फका भक्तजनहरू हर्दीस्थित कालीगण्डकी पुल हुँदै देवघाट प्रवेश गर्न सक्नेछन्। मुग्लिनबाट आउने सवारीसाधनलाई दासढुङ्गाबाट सिधै देवघाटधाम प्रवेश गराई फर्कँदा सोही मार्ग प्रयोग गरिने व्यवस्था मिलाइएको छ।
पार्किङ व्यवस्थाअन्तर्गत चितवनतर्फबाट आउने साना सवारीसाधनहरू सीताराम संस्कृत माध्यमिक विद्यालयको परिसरमा राख्न सकिनेछ भने ठूला सवारीसाधन (बस, माइक्रो, मिनीबस) का लागि चन्द्रलोक स्वर्गद्वार उत्तर–पूर्वतर्फको बसपार्क प्रयोग गरिने समितिले जनाएको छ।
पैदल यात्रीका लागि छुट्टै मार्ग
तनहुँतर्फबाट पैदल आउने भक्तजनहरूका लागि पुलको मुख, हरिहर चोक, हरिहर मन्दिर, गलेश्वर चोक हुँदै वेणीसङ्गम पुग्ने र फर्कँदा वेणीसङ्गम, गलेश्वर आश्रम, चक्रवर्ती मन्दिर, महेश सन्यास आश्रम, टाउन चोक हुँदै पुलको मुख निस्कने व्यवस्था गरिएको छ।
सुरक्षा, अनुशासन र निषेधित कार्य
तीर्थयात्रीको सुरक्षा र सुविधा सुनिश्चित गर्न तीन सयभन्दा बढी सुरक्षाकर्मी परिचालन गरिने देवघाट क्षेत्र विकास समितिका अध्यक्ष डा. ईश्वरीराज लौडारीले जानकारी दिए। यसका लागि तनहुँ, चितवन र नवलपुरका प्रमुख जिल्ला अधिकारी, नेपाली सेना, नेपाल प्रहरी, सशस्त्र प्रहरी तथा स्थानीय सरकारसँग समन्वय गरिएको छ।
देवघाटधाम क्षेत्रभित्र धुम्रपान, मदिरा, मांसाहार तथा सुर्तीजन्य पदार्थ पूर्ण रूपमा निषेध गरिएको छ। ती वस्तुको बिक्री, ओसारपसार र सेवन नगरी सहयोग गर्न समितिले श्रद्धालुहरूलाई आग्रह गरेको छ। साथै, वेणीसङ्गममा स्नानका लागि सुरक्षित क्षेत्र डोरी लगाएर छुट्याइएको र सोभन्दा बाहिर गहिरो स्थानमा स्नान नगर्न सचेत गराइएको छ।
आज विधिवत् मेलाको शुभारम्भ
समितिका अनुसार आज बिहान देवघाटधामका विभिन्न आश्रमका पीठाधीशहरूको उपस्थितिमा धार्मिक विधिपूर्वक वेणीसङ्गममा लिङ्गो गाडेर मेलाको औपचारिक शुभारम्भ गरिनेछ।
माघेसङ्क्रान्तिको पावन अवसरमा देवघाटधाम पुगेर स्नान, पूजा र दान गर्ने हजारौँ भक्तजनका लागि यस वर्षको मेला श्रद्धा, आस्था र व्यवस्थित व्यवस्थापनको प्रतीक बन्ने अपेक्षा गरिएको छ।
