काठमाडौं । गैरआवासीय नेपाली संघ (एनआरएनए) ले मध्यपूर्व क्षेत्रमा रहेका नेपाली नागरिकलाई सहयोग पुर्याउने उद्देश्यले १ करोड रुपैयाँको राहत कोष स्थापना गर्ने निर्णय गरेको छ। हालै सम्पन्न महाधिवेशनपछि गठन भएको नयाँ कार्यसमितिको पहिलो बैठकले यो पहल अघि बढाएको हो।
अध्यक्ष डा. हेमराज शर्माका अनुसार तत्काल उक्त रकम जुटाएर आवश्यक राहत कार्यमा परिचालन गरिनेछ। यसका लागि संघभित्रैबाट स्रोत संकलन गर्ने योजना बनाइएको छ भने प्रभावित क्षेत्रमा सहयोग पुर्याउन विशेष कार्यदल (टास्क फोर्स) पनि गठन गरिनेछ।
संघले आफ्ना करिब १ लाख ३० हजार सदस्यहरूबाट न्यूनतम एक डलरका दरले योगदान संकलन गर्ने लक्ष्य राखेको छ। दीर्घकालीन रूपमा यो कोषलाई ६ करोड रुपैयाँसम्म विस्तार गर्ने योजना समेत तय गरिएको छ।
त्यसैगरी, संघका पदाधिकारीहरूले राजनीतिक निष्पक्षता कायम राख्ने प्रतिबद्धता जनाएका छन्। कुनै पनि दल वा भ्रातृ संगठनसँग आबद्ध नहुने, सामाजिक सञ्जालमा राजनीतिक टिप्पणी नगर्ने तथा व्यक्तिविरुद्ध आक्षेप नलगाउने विषयमा उनीहरूले सहमति जनाएका छन्। आवश्यक परे राजनीतिक सम्बन्ध त्याग्ने तयारीसमेत गरिएको जनाइएको छ।
बैठकले सचिवालय व्यवस्थापनलगायत अन्य प्रशासनिक विषयहरूमा पनि निर्णय गरेको छ। नवगठित कार्यसमितिको छलफल क्रम केही दिनसम्म जारी रहने बताइएको छ।
