काठमाडौँ । सरकारको पछिल्लो कामकारबाहीप्रति असन्तुष्टि जनाउँदै विद्यार्थीहरू सडकमा उत्रिएका छन्। पेट्रोलियम पदार्थलगायत दैनिक उपभोग्य वस्तुमा गरिएको मूल्यवृद्धि तथा विद्यार्थी संगठनमाथि हस्तक्षेप गर्ने सरकारी निर्णयको विरोधमा उनीहरूले मसाल जुलुस निकालेका हुन्।
सोमबार संयुक्त विद्यार्थी संगठनको अगुवाइमा ठमेलस्थित सरस्वती क्याम्पसबाट सुरु भएको जुलुस शहरका विभिन्न भाग परिक्रमा गर्दै अघि बढेको थियो। हातमा मसाल बोकेर नाराबाजी गर्दै हिँडेका विद्यार्थीहरूले सरकारको निर्णय तत्काल फिर्ता लिन माग गरेका छन्।
प्रदर्शनमा सहभागी विद्यार्थी नेताहरूले मूल्यवृद्धिले सर्वसाधारणको जनजीवन प्रभावित भएको भन्दै यसको जिम्मेवारी सरकारले लिनुपर्ने बताए। साथै, विद्यार्थी संगठनमाथि गरिएको हस्तक्षेप लोकतान्त्रिक अधिकारविरुद्ध भएको उनीहरूको आरोप छ।
उनीहरूले सरकारसँग आफ्ना मागहरू सम्बोधन नगरे थप सशक्त आन्दोलन गर्ने चेतावनीसमेत दिएका छन्।
प्रदर्शनका कारण केही समय सडक आवागमन प्रभावित भए पनि स्थिति सामान्य रहेको प्रहरीले जनाएको छ।
