काठमाडौँ । इलाम जिल्लाको सन्दकपुर गाउँपालिका-४, गुम्बाडाँडामा अवस्थित पञ्चकन्या हाइड्रोपावरमा सोमबार दिउँसो अप्रत्याशित रूपमा मुख्य पाइप फुट्दा विद्युत् उत्पादन प्रभावित भएको छ।
करिब दिउँसो ३ बजेतिर पावर हाउसतर्फ पानी लैजाने मुख्य पाइप चुँडिँदा ठूलो परिमाणमा पानी बाहिरिएको थियो। घटनाबारे जानकारी प्राप्त हुनासाथ प्रहरी चौकी माबुबाट सुरक्षाकर्मीको टोली तत्काल घटनास्थलतर्फ खटिएको जिल्ला प्रहरी कार्यालय इलामले जनाएको छ।
पाइप फुट्दा आसपास क्षेत्रमा पानी फैलिएको भए पनि कुनै मानविय वा पशुचौपायाको क्षति नभएको प्रहरीले स्पष्ट पारेको छ। यद्यपि, घटनाले हाइड्रोपावरको नियमित विद्युत् उत्पादनमा असर परेको छ।
प्राविधिक टोलीले दिएको जानकारीअनुसार पाइपभित्र सञ्चित पानी पूर्ण रूपमा बाहिरिएपछि मात्रै मर्मत कार्य सुरु गर्न सकिने अवस्था रहेको छ।
घटनाबारे थप अनुसन्धान जारी रहेको र आवश्यक समन्वय भइरहेको जिल्ला प्रहरी कार्यालय इलामले जनाएको छ।
