काठमाडौं। स्वर्णिम वाग्लेले सरकार जनताको विश्वास जित्दै आर्थिक विकासलाई गति दिने दिशामा केन्द्रित रहेको बताएका छन्।
बाह्रखरी मिडिया ले काठमाडौंमा आयोजना गरेको आर्थिक परिसंवाद कार्यक्रममा बोल्दै उनले बहुमत प्राप्त सरकारमाथि जनताको अपेक्षा उच्च रहेको र त्यसअनुसार काम गर्नुपर्ने जिम्मेवारी आफूहरूमा आएको बताए।
उनले अहिलेको समय अर्थतन्त्रलाई सही दिशामा लैजान निर्णायक रहेको उल्लेख गर्दै मिहिनेत, विश्वास र सतर्कताका साथ काम गरे मुलुकको आर्थिक अवस्था सुधार्न सकिने धारणा राखे। साथै, बजेट निर्माण प्रक्रियामा पनि यही लक्ष्यलाई प्राथमिकता दिइएको जानकारी दिए।
अर्थमन्त्री वाग्लेले निजी क्षेत्रलाई साझेदारका रूपमा लिएर अघि बढ्ने स्पष्ट सन्देश दिएका छन्। “व्यवसायीको सुरक्षा र लगानीको वातावरण सुनिश्चित गर्दै रोजगारी सिर्जना गर्ने उद्यमीलाई सरकारले साथ दिन्छ,” उनले भने।
सरकारको यो धारणा सार्वजनिक–निजी सहकार्यमार्फत अर्थतन्त्रलाई पुनर्जीवित गर्ने रणनीतिका रूपमा हेरिएको छ।
