काठमाडौँ । नेपाली काँग्रेसको विशेष महाधिवेशन आज नयाँ नेतृत्व चयनको निर्णायक चरणमा प्रवेश गरेको छ। बन्दसत्र सम्पन्न भएसँगै महाधिवेशन निर्वाचन प्रक्रियामा केन्द्रित भएको हो।
पार्टीको आगामी राजनीतिक दिशा तय गर्ने महत्त्वपूर्ण नेतृत्व चयन आजै हुने कार्यतालिका निर्वाचन समितिले सार्वजनिक गरेको छ।
निर्वाचन समितिले गएराति ९ बजेदेखि मतदान सुरु गर्ने तयारी गरे पनि मनोनयन दर्ता प्रक्रिया सुरु भएसँगै मतदान कार्यक्रम आजका लागि सारिएको थियो। समितिका अनुसार आज बिहान ८ बजेदेखि निर्वाचन प्रक्रिया पुनः सुरु हुनेछ र निर्धारित कार्यतालिकाअनुसार मतदान अघि बढाइनेछ।
यसअघि मंगलबार सम्पन्न बन्दसत्रमा महामन्त्रीद्वय गगन थापा र विश्वप्रकाश शर्माले प्रस्तुत गरेका विधान संशोधन प्रस्ताव तथा राजनीतिक प्रस्ताव सुझावसहित सर्वसम्मत रूपमा पारित गरिएको थियो। ती प्रस्ताव पारित भएसँगै पार्टीको आन्तरिक संरचना, निर्णय प्रक्रिया र भावी राजनीतिक रणनीतिमा स्पष्ट दिशा तय भएको नेताहरूको भनाइ छ।
बन्दसत्रले नै पाँच सदस्यीय निर्वाचन समिति गठन गरेपछि महाधिवेशन औपचारिक रूपमा निर्वाचन चरणमा प्रवेश गरेको हो। निर्वाचन समितिको संयोजकको जिम्मेवारी वरिष्ठ अधिवक्ता सीताराम केसीलाई दिइएको छ। समितिका अन्य सदस्यहरूमा अशोक पोखरेल, गोकर्ण बन्जाडे, आरसी विमल पौडेल र रामचन्द्र गौतम रहेका छन्।
निर्वाचन समितिले पारदर्शी, निष्पक्ष र लोकतान्त्रिक विधिबाट नेतृत्व चयन गरिने विश्वास व्यक्त गर्दै सबै प्रतिनिधि र उम्मेदवारलाई निर्वाचन प्रक्रियामा सक्रिय सहभागिता जनाउन आग्रह गरेको छ।
काँग्रेसको विशेष महाधिवेशनबाट चयन हुने नयाँ नेतृत्वले पार्टी संगठनलाई थप सुदृढ बनाउँदै राष्ट्रिय राजनीतिमा काँग्रेसको भूमिकालाई पुनः प्रभावशाली बनाउने अपेक्षा गरिएको छ। आजको निर्वाचनले पार्टीभित्रको शक्ति सन्तुलन, भावी रणनीति र आगामी निर्वाचनको तयारीमा समेत गहिरो प्रभाव पार्ने देखिएको छ।
