काठमाडौं । प्रगतिशील लोकतान्त्रिक पार्टीका संरक्षक तथा पूर्वप्रधानमन्त्री डा. बाबुराम भट्टराईले काठमाडौं महानगरपालिकाका मेयर बालेन शाहसँग भेटवार्ता गरेका छन्।
पछिल्ला दिनहरूमा बालेनले संसदीय राजनीतितर्फ संकेत गर्ने गरी सक्रियता बढाएपछि बाबुराम पनि आज कुपण्डोल पुगेका हुन्।
भेट कुपण्डोलस्थित कुमार बेनको निवासमा भएको हो, जुन पछिल्लो समय वैकल्पिक राजनीतिक शक्तिहरूको भेटघाट केन्द्रका रूपमा चिनिँदै आएको छ। भेटपछि सञ्चारकर्मीहरूसँग प्रतिक्रिया दिँदै बाबुरामले नयाँ र वैकल्पिक राजनीतिक शक्तिहरू एक ठाउँमा उभिनुपर्ने आवश्यकता औँल्याए।
उनले आफूले लामो समयदेखि उठाउँदै आएको धारणा दोहोर्याउँदै भने, नयाँ सोच र वैकल्पिक शक्तिहरू मिलेर अघि बढ्नुपर्ने समय आएको छ। सोही सन्देश आफूले बालेन शाहसमक्ष पनि राखेको र वैकल्पिक शक्ति निर्माणको पहल गर्न आग्रह गरेको बताए।
बाबुरामसँगको भेटअघि बालेन शाहले राष्ट्रिय स्वतन्त्र पार्टीका सभापति रवि लामिछाने, नेपाल विद्युत् प्राधिकरणका पूर्व कार्यकारी निर्देशक कुलमान घिसिङ, सांसद ज्ञानेन्द्र शाही, सुनिल शर्मा, सुधन गुरुङलगायत विभिन्न राजनीतिक तथा सामाजिक व्यक्तित्वहरूसँग भेटघाट गरिसकेका थिए।
यी भेटघाटहरूले नेपाली राजनीतिमा नयाँ समीकरण र वैकल्पिक धार निर्माणतर्फ संकेत गरिरहेको चर्चा बढ्दै गएको छ।
