काठमाडौं । पूर्वी नेपालको काँकरभिट्टास्थित मेची भन्सार कार्यालयमा परीक्षणको रूपमा ‘अनलाइन भ्यालुएसन सफ्टवेयर’ प्रणाली लागू गरिएको छ। नयाँ प्रणालीमा सन्दर्भ मूल्य सूचीको साटो कारोबर मूल्यलाई आधार मान्दै व्यापारिक वस्तुको यथार्थ मूल्याङ्कन गरिनेछ।
मेची भन्सार कार्यालयका प्रमुख कर अधिकृत शिवलाल न्यौपानेका अनुसार यसले भन्सार प्रक्रिया पारदर्शी, छरितो र छिटो बनाउनेछ। परीक्षणको रूपमा मेचीसहित देशका आठवटा भन्सार कार्यालयमा यो प्रणाली सुरु गरिएको छ। विशेषगरी झापाको मेची र भद्रपुर भन्सारमा पुसको दोस्रो सातादेखि प्रयोग सुरु भइसकेको छ।
न्यौपानेले भने, “वैध व्यापारलाई प्रोत्साहन दिँदै राजस्व चुहावट घटाउने हाम्रो प्रयास हो। यस प्रणालीले अनियमित कारोबारलाई न्यूनतम बनाउनेछ।”
प्रणालीको शुभारम्भमा उपस्थित अर्थ मन्त्रालयका सहसचिव उत्तरकुमार खत्रीले भने, “भन्सारमा हुने अनियमितता र अनौपचारिक कारोबार घटाउने उद्देश्यले यो प्रणाली लागू गरिएको हो। सरकारले सुशासन र करदातामैत्री व्यवस्थालाई प्रोत्साहन गर्दैछ र निजी क्षेत्रको सहकार्य आवश्यक छ।”
विश्व व्यापार संगठन (WTO)ले पनि आफ्ना सदस्य देशहरूमा अनलाइन भ्यालुएसन प्रणाली लागू गर्न सुझाव दिँदै आएको थियो।
