काठमाडौं । सुपर खुदी हाइड्रोपावर लिमिटेडले पुस २२ गतेदेखि आईपीओ निष्काशन गर्ने घोषणा गरेको छ।
पहिलो चरणमा आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीहरुलाई लक्षित गरिएको छ।
कम्पनीले जारी पूँजी १ अर्ब ५५ करोड रुपैयाँको २० प्रतिशत अर्थात ३१ करोड रुपैयाँ बराबरको ३१ लाख कित्ता शेयर निष्काशन गर्ने अनुमति पाएको छ। यसमध्ये १५ लाख ५० हजार कित्ता साधारण शेयर आयोजनाबाट प्रभावित स्थानीय बासिन्दालाई वितरण गरिनेछ, जसको मूल्य प्रतिशेयर १०० रुपैयाँ तोकिएको छ।
स्थानिय बासिन्दाको लागि बाँडफाँड यसरी हुनेछ:
४० प्रतिशत (६ लाख २० हजार कित्ता)- मर्स्याङ्दी गाउँपालिका वडा नं. २ र ३ का बासिन्दा
६० प्रतिशत (९ लाख ३० हजार कित्ता)- मर्स्याङ्दी गाउँपालिका वडा नं. १, ४, ५, ६, ७, ८ र ९ का बासिन्दा
त्यसैगरी, वैदेशिक रोजगारीमा रहेका नेपालीका लागि १ लाख ५५ हजार कित्ता शेयर छुट्याइएको छ। उनीहरूले नेपाल धितोपत्र बोर्डबाट अनुमति लिई, आस्बा प्रणालीमार्फत आवेदन दिन सक्नेछन्।
आईपीओमा न्यूनतम १० कित्ता र अधिकतम १ लाख कित्ता आवेदन दिन सकिनेछ। आयोजना प्रभावित क्षेत्रका स्थानीयका लागि आवेदन प्रक्रिया माघ ६ देखि माघ २१ सम्म सञ्चालन हुनेछ भने वैदेशिक रोजगारीमा रहेका नेपालीका लागि पुस २५ देखि माघ ६ सम्म खुला हुनेछ।
शेयर निष्काशन र बिक्री प्रबन्धक ग्लोबल आइएमई क्यापिटल लिमिटेड रहेको छ। रेटिङको क्रममा, केयर रेटिङ नेपालले कम्पनीलाई केयरएनपी डबल बी इस्यूअर रेटिङ प्रदान गरेको छ, जसले मध्यम जोखिम रहेको संकेत गर्दछ।
