काठमाडौँ । सातदोबाटोस्थित प्रिमियर इन्टरनेशनल स्कुलको फुटसल मैदानमा आयोजित नेपाल टोस्टमास्टर्स फुटसल प्रतियोगिता सिजन-३ सम्पन्न भएको छ।
डिस्ट्रिक्ट ४१ अन्तर्गतको डिभिजन ‘ए’ ले आयोजना गरेको यस प्रतियोगिता खेल मात्र नभई समुदाय, सहकार्य र आपसी सद्भावको उत्सव बनेको थियो।
प्रतियोगितामा नेपालका विभिन्न स्थानबाट आएका १२ टिम र १२० भन्दा बढी खेलाडी सहभागी भएका थिए। अनुभवी सदस्यदेखि नयाँ सदस्यसम्म सबै खेलाडीहरू प्रतिस्पर्धा र मित्रताको साझा भावनाले जोडिएका देखिन्थे। दिनभर मैदानमा स्वस्थ प्रतिस्पर्धा, आपसी सम्मान, हौसला र टिमवर्कको सुन्दर झलक देखियो।
प्रतिस्पर्धाको अन्तिम चरणमा ललितपुर लायन्स र ८८४९ एफसीबीच रोमाञ्चक फाइनल खेल सम्पन्न भयो। कडा प्रतिस्पर्धापछि ललितपुर लायन्स विजेता बन्दै च्याम्पियन ट्रफी उचाल्न सफल भयो। व्यक्तिगत विधातर्फ ८८४९ एफसीका अभिनव श्रेष्ठ सर्वोत्कृष्ट खेलाडी घोषित भए भने बिभिएस नाइट्सकी सोनी चौरासिया उत्कृष्ट महिला खेलाडी बनिन्। त्यस्तै, ललितपुर लायन्सका सुजल साहिले सर्वाधिक गोलकर्ताको उपाधि हात पारे।
कार्यक्रमको सफलतामा क्यानन, वाल आर्टिस्ट्री इम्पेरो, एस इन्स्टिच्युट अफ म्यानेजमेन्ट, फोन स्टोर र प्रिमियर इन्टरनेशनल स्कुल प्रायोजकको रूपमा रहेका थिए। साथै डाबर नेपाल, भिजनसाइन, नेपाल मेडिसिटी र भिजन क्रिएसन रणनीतिक साझेदारको रूपमा जोडिएका थिए। आयोजकका अनुसार स्वयंसेवकहरूको सक्रिय योगदानले प्रतियोगितालाई आत्मीय, समावेशी र व्यवस्थित बनाउन महत्वपूर्ण भूमिका खेलेको थियो।
नेपाल टोस्टमास्टर्स फुटसल प्रतियोगिता अब एक लोकप्रिय वार्षिक कार्यक्रमको रूपमा स्थापित हुँदै गएको छ। यसले खेलमार्फत मात्र होइन, सदस्यहरूबीच मित्रता, समुदाय निर्माण, नेतृत्व विकास र टिमवर्कको महत्व बुझ्ने अवसर पनि प्रदान गर्दै आएको छ। खेल मैदानमै नेतृत्व र सहकार्य कस्तो हुनुपर्छ भन्ने सन्देश दिएको यस प्रतियोगिताले समुदायलाई अझ नजिक ल्याउने काम गरेको सहभागीहरूको भनाइ छ।
