काठमाडौँ । नेपाल बैंक लिमिटेड र नेशनल प्याथ ल्याब रिसर्च सेन्टर प्रा. लि. बीच स्वास्थ्य जाँच तथा उपचार सेवामा सम्झौता भएको छ।
सम्झौता अनुसार बैंकमा कार्यरत कर्मचारी र बैंकमा खाता रहेका ग्राहकहरूले नेशनल प्याथ ल्याबका विभिन्न शाखामा उपलब्ध प्याथोलोजी ल्याब सेवा तथा हेल्थ प्याकेजहरूमा १० प्रतिशतदेखि ५० प्रतिशतभन्दा बढी छुट प्राप्त गर्न सक्नेछन्।
निश्चित शर्तभित्र रहेर केही सेवामा निःशुल्क होम डेलिभरी सुविधा समेत उपलब्ध गराइने जनाइएको छ।
सम्झौता पत्रमा २०८२ साल पुस १४ गते नेपाल बैंक लिमिटेडको तर्फबाट बजारीकरण तथा अनुसन्धान डिभिजनका प्रमुख निर्मल सुवेदी र नेशनल प्याथ ल्याब रिसर्च सेन्टर प्रा. लि.का तर्फबाट प्रबन्ध निर्देशक पवन जोशीले हस्ताक्षर गरेका छन् ।
यस सम्झौताबाट नेपाल बैंकका कर्मचारी र ग्राहकहरूले नेशनल प्याथ ल्याबका नक्साल, महाराजगञ्ज, ललितपुर, पोखरा, चितवन, रुपन्देही, भैरहवा, तुलसीपुर, घोराही, धनगढी, गुल्मी, अर्घाखाँची र महेन्द्रनगर लगायतका विभिन्न स्थानमा रहेका शाखाबाट उच्चस्तरीय स्वास्थ्य परीक्षण तथा उपचार सेवा सहज र किफायती दरमा प्राप्त गर्न सक्नेछन्।
नेपाल बैंक र नेशनल प्याथ ल्याबबीच भएको यो सहकार्यले बैंकका कर्मचारी तथा ग्राहकहरूको स्वास्थ्य सुरक्षामा थप टेवा पुग्ने विश्वास दुवै पक्षले व्यक्त गरेका छन्।
