काठमाडौं । संस्कृति, पर्यटन तथा नागरिक उड्डयन मन्त्रालयले नेपाललाई विश्वस्तरीय आरोग्य (वेलनेस) पर्यटन गन्तव्य बनाउने लक्ष्यसहित पाँच वर्षे कार्ययोजना सार्वजनिक गरेको छ।
सन् २०२६–२०३५ अवधिलाई समेट्दै ल्याइएको रणनीतिले २०३० सम्म नेपाल आउने पर्यटकमध्ये ११ प्रतिशतलाई आरोग्य सेवातर्फ आकर्षित गर्ने लक्ष्य राखेको छ।
रणनीतिअनुसार लुम्बिनी लाई आध्यात्मिक आरोग्य केन्द्रका रूपमा विकास गरिनेछ भने नगरकोट र धुलिखेल जस्ता स्थानलाई इको–रिट्रिट गन्तव्य बनाइनेछ। त्यस्तै मनाङ र मुस्ताङ मा जडीबुटी र हिमाली वातावरणमा आधारित आरोग्य कार्यक्रम सञ्चालन गरिने योजना छ।
सरकारले ‘हिल इन नेपाल’ डिजिटल पोर्टल र ‘वेलनेस नेपाल’ अभियानमार्फत अन्तर्राष्ट्रिय बजारमा प्रवर्द्धन गर्ने भएको छ। साथै, योग, ध्यान, आयुर्वेद र स्पा सेवाको गुणस्तर सुनिश्चित गर्न मापदण्ड कडाइका साथ लागू गरिनेछ।
लगानी प्रवर्द्धनका लागि ‘नेपाल आरोग्य पर्यटन विकास कोष’ स्थापना गर्ने तथा पोखरा र लुम्बिनी मा आरोग्य पार्क निर्माण गर्ने योजना पनि अघि सारिएको छ।
सरकारको विश्वास छ- प्राकृतिक सौन्दर्य, सांस्कृतिक धरोहर र आध्यात्मिक परम्पराको संयोजनले आरोग्य पर्यटनमार्फत देशको आर्थिक विकासमा नयाँ गति दिनेछ।
