काठमाडौँ । राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजक, मेडिकल व्यवसायी दुर्गा प्रसाईँले आफू राजावादी नभएको बताएका छन् ।
प्राइम टाइम्स टेलिभिजनसग संवाद गर्दै उनले आफू राजावादी नभएर राष्ट्रवादी रहेको बताएका हुन् । उनले देशमा राजसंस्था फर्किनेमा कुनै आशंका नरहेको बताए । राजसंस्था फर्किएन भने अबको १० वर्षमा देशको हालत खराब हुने उनको भनाइ छ । उनले पूर्व राजा ज्ञानेन्द्र शाह पनि राजावादी नभएर राष्ट्रवादी रहेको उनको भनाइ छ ।
‘म राजावादी होइन । म राष्ट्रवादी हो । राजा कुनै वाद विवादमा हुँदैनन् । राजा राष्ट्रवादी हुन्छन् । पूर्व राजा ज्ञानेन्द्र शाहको पछाडि होइन, राजसंस्था चाहिन्छ भनेर लागेको हो । राजसंस्था अपरिहार्य रहेछ भनेर त यही लिपुलेक, कालापानीले देखाइहाल्यो नि । राजसंस्था त फर्किन्छ । राजसंस्था फर्किएन भने नि अबको १० वर्ष पछाडि तपाईँले देख्नुहोला हालत के हुन्छ । म राजसंस्थाको पक्षमा छु, राजावादी म होइन । म राष्ट्रको पक्षमा छु, म अराष्ट्रिय तत्व होइन । पूर्व राजा ज्ञानेन्द्र नि राजावादी हुनुहुन्न, राष्ट्रवादी हो,’– उनले भने ।
राजावादी र राष्ट्रिय प्रजातन्त्र पार्टी (राप्रपा) को नेतृत्वमा राजसंस्था नफर्किने उनले बताए । उनले आफू पूर्वराजा ज्ञानेन्द्र, पारस, हृदेयन्द्रलगायत कसैको पक्षमा पनि नरहेको बताए । जो आए पनि संस्था रहोस् भन्ने आफ्नो चाहना रहेको उनको भनाइ छ । उनले आफूले सुरु गरेको अभियान गरिब र सर्वहारा वर्गको अभियान रहेको बताउँदै यो अभियान नमरेको दाबी गरे ।
प्रसाईँले पूर्वराजा ज्ञानेन्द्र शाहलाई भेट्दा उनको आँखामा आँशु छचल्किएको हेर्न नसकेर राजसंस्थाको पक्षमा आफू उभिएको बताए । ‘मैले देशको विषयमा कुरा गर्दाखेरी उहाँको आँखाबाट छचल्किएका आँशु, भुईँमा झरेको आँशु अब नझरुन् भनेर लागेको मान्छे हुँ म,’– उनले भने । ‘देश बर्वाद भयो प्रसाईँजी । हामीलाई पनि निकालिहाले । अब हामी त्यो ठाउँमा छैनौं’ भनेर आफूलाई राजाले गुनासो गरेको उनले बताए ।
Read More
