काठमाडौँ । युइए एसीसी पुरुष यू–१९ प्रिमियर कपको च्याम्पियन बनेको छ । सोमबार भएको फाइनल खेलमा नेपाललाई २७ रनले पराजित गर्दै युएईले प्रतियोगिताको उपाधि जितेको हो ।
फाइनलमा युएईले दिएको १४८ रनको लक्ष्य पछाएको नेपालले ३३.२ ओभरमा अल आउट हुदै १२० रन मात्र बनाएको थियो । यसअघि टस हारेर पहिला ब्याटिंग गरेको युएईले ४५.५ ओभरमा अलआउट हुदै १४७ रन बनाएको थियो ।
नेपाल फाइनलमा पराजित भएपनि आगामी डिसेम्बरमा हुने यू-१९ एशिया कपमा भने छनौट भएको छ ।
काठमाडौँ । भारतीय नेशनल काँग्रेसकी अध्यक्ष सोनिया गान्घी र राहुल गान्धीविरुद्ध एफआइआर दर्ता गरिएको छ । नेशनल हेराल्ड मुद्दामा सोनिया गान्धी र राहुल गान्धीविरुद्ध एफआईआर दर्ता गरिएको भारतीय मिडियाहरुले उल्लेख गरेका छन् ।
मुद्धा दर्ता भएपछि वरिष्ठ वकिल तथा कांग्रेस नेता अभिषेक मनु सिंघवीले नेशनल हेराल्ड मुद्दा एउटा अनौठो उदाहरण हो जहाँ कुनै पनि मौद्रिक लेनदेन वा लाभ बिना नै मनी लान्ड्रिङको मुद्दा बनाइएको आरोप लगाएका छन् ।
उनले भने- ‘नेशनल हेराल्डको मूल कम्पनी एसोसिएटेड जर्नल्स लिमिटेड धेरै पुरानो कम्पनी हो । यो कम्पनीले ब्रिटिश कालमा पनि बेलायतीहरूको विरुद्धमा उभिएको थियो । अखिल भारतीय कांग्रेस समितिले विभिन्न समयमा कम्पनीलाई ऋण प्रदान गरेको थियो, जुन एक समयमा ९० करोड थियो ।’
सिंघवीले कम्पनीलाई बलियो बनाउन यसको ऋणलाई इक्विटीमा परिणत गरिएको थियो र ऋणलाई इक्विटीमा परिणत गर्न अर्को कम्पनी, यंग इन्डियन गठन गरिएको थियो । यसरी, एजीएलको शेयर होल्डिङ यंग इन्डियनको हातमा आयो । यो सम्पूर्ण प्रक्रियामा न त पैसा न त सम्पत्ति हस्तान्तरण गरिएको थियो ।
उनले यस विषयमा कुनै सरकारी गुनासो नभएको बेला, ईडीलाई मुद्दामा संलग्न गराउन सकिँदैन किनभने ईडी ऐनले केवल एक अधिकार प्राप्त अधिकारीले मात्र उजुरी दर्ता गर्न सक्ने उनले बताए ।
आइतबार, प्रवर्तन निर्देशनालय (ईडी) को उजुरीको आधारमा, दिल्ली प्रहरीले नेशनल हेराल्ड मुद्दामा सोनिया गान्धी र राहुल गान्धी विरुद्ध एफआईआर दर्ता गरेको बताइएको छ । कांग्रेसका सञ्चार प्रमुख जयराम रमेशले भाजपाको आलोचना गर्दै सम्पूर्ण मुद्दालाई झूटो र आधारहीन भनेका थिए ।
काठमाडौँ । गत भाद्र २३ र २४ गते भएको प्रदर्शनको क्रममा लुटिएको प्रहरीको हतियारसहित तीन जना पक्राउ परेका छन् ।
काठमाडौँ उपत्यका अपराध अनुसन्धान कार्यालयका अनुसार काठमाडौँ-१४ कलंकी घर भई भुरूङखेल बस्ने २८ बर्षिय रसिल जोशी, दार्चुलाको दुहुँ गाउँपालिका-४ घर भई हाल काठमाडौँको सुन्धारा बस्ने वर्ष १९ बर्षिय डेबिड भन्ने रामचन्द्र कुँवर र काठमाडौँ-१३ बाफल बस्ने ३१ बर्षिय विराट प्रसाद जोशी पक्राउ परेका हुन् ।
उनीहरुसँगबाट नेपाल प्रहरी लेखिएको टाइप ५४ पेस्तोल र दुई थान मोबाइल जफत गरिएको प्रहरीले जनाएको छ । तिनै जनालाई प्रहरीको स्वचालित हतियारसहित पक्राउ गरी थप अनुसन्धान तथा आवश्यक कारबाहिको लागि जिल्ला प्रहरी परिसर भद्रकाली काठमाडौँ पठाइएको प्रहरी उपरिक्षक काजी कुमार आचार्यले जानकारी दिएका छन् ।
अनुसन्धानको क्रममा रसिल जोशी प्रहरी वृत्त स्वयम्भु काठमाडौँमा लागु औषध मुद्दामा हिरासतको अवस्थामा भदौ २४ गते हिरासतबाट भागी फरार भएको समेत खुलेको छ ।
काठमाडौँ । निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले राष्ट्रिय सभाका अध्यक्ष नारायण प्रसाद दाहालसँग भेट गरेका छन् ।
आगामी राष्ट्रिय सभा तथा प्रतिनिधि सभा निर्वाचनलाई निष्पक्ष, व्यवस्थित र समयमै सम्पन्न गराउन निर्वाचन आयोग सक्रिय रूपमा जुटिरहेका बेला भण्डारीले आज दाहालसँग विशेष भेटवार्ता गरेका हुन् ।
सिंहदरबारस्थित अध्यक्ष दाहालको कार्यकक्षमा भएको सो भेटमा आयुक्त भण्डारीले माघ ११ गते हुने राष्ट्रिय सभा निर्वाचनका लागि आयोगले गर्दै आएको तयारीबारे विस्तृत जानकारी दिए। उनले मतदाता शिक्षा, मतदान केन्द्र व्यवस्थापन, कर्मचारी प्रशिक्षण, सुरक्षा समन्वयदेखि लिएर मतदान सामग्रीको वितरणसम्मका विषयमा आयोगले अपनाएका कदमबारे अध्यक्षलाई अवगत गराए ।
यस्तै, उनले फागुन २१ गते तोकिएको प्रतिनिधिसभा निर्वाचनका लागि पहिले नै सुरु गरिएका पूर्वतयारी, कानुनी प्रक्रिया, आवश्यक व्यवस्थापन र सरोकारवालासँग भइरहेको समन्वयबारे पनि जानकारी गराए ।
राष्ट्रियसभा अध्यक्ष दाहालले निर्वाचन आयोगले देखाएको सक्रियता र तत्परतालाई प्रशंसनीय बताउँदै आगामी निर्वाचनहरू सफल बनाउने वातावरण निर्माणमा आयोगले महत्वपूर्ण योगदान दिएको बताए। उनले भने, “निर्वाचन आयोगको पहलकदमी र उद्यमशील भूमिकाले निर्वाचनका लागि देशमा राम्रो वातावरण बनेको छ। यसको प्रशंसा हुनैपर्छ।”
दाहालले निर्वाचनलाई पारदर्शी, निष्पक्ष र सुचारु बनाउने काममा राष्ट्रियसभा संस्था पूर्ण रूपमा सहयोग गर्न तैयार रहेको विश्वास दिलाए।
अध्यक्ष दाहालका अनुसार, लोकतान्त्रिक अभ्यासका लागि विश्वसनीय निर्वाचन प्रक्रिया अपरिहार्य भएकाले सबै पक्षले आफ्नो जिम्मेवारी गम्भीर रूपमा पूरा गर्नुपर्नेछ।
दुवै निर्वाचन मिति नजिकिँदै गर्दा आयोगले मतदाता सूची अद्यावधिक, कर्मचारी परिचालन, निर्वाचन सामाग्री व्यवस्थापन, सुरक्षा निकायसँग समन्वय र सूचना प्रवाहका माध्यमहरू सक्रिय बनाउँदै आएको छ। भेटवार्ता मार्फत आयोगले तयारीका चरणहरू राजनीतिक नेतृत्वलाई अवगत गराउनु, विश्वसनीय वातावरण निर्माण गर्न एक महत्वपूर्ण कदमका रूपमा हेरिएको छ ।
काठमाडौँ । काठमाडौँ महानगरपालिकाको वडा नम्बर २७ असनमा यिताचपा सत्तल, गणेश मन्दिर, नारायण मन्दिर, उमा महेश्वर मन्दिर, डवली र भोटाहिटीमा रहेको कलश द्वारसहित पुननिर्माण सम्पन्न गरिएका सांस्कृतिक सम्पदाहरुको उद्घाटन गरिएको छ ।
यी संरचनामध्ये यिताचपा सत्तल, सबैभन्दा धेरै लागत भएको अर्थात् २ करोड ८४ लाख २९ हजार ४५६ रुपियाँमा निर्माण सम्पन्न भएको योजना हो । यसको लागत अनुमान भ्याटसहित २ करोड ९१ लाख ३२ हजार ५०४ रुपियाँ थियो । यो कामका लागि शुभश्री न्यू ए टु जेड जेभीलाई २०८१ जेठ २१ गते कार्यादेश दिइएको थियो । सत्तलको पुनःनिर्माण गर्दा इटा, चुनासुर्की, बालुवा, काठ, ढुङ्गा, तेलिया इटा, झिँगटी प्रयोग गरिएको छ ।
आर्किटेक्ट अमित बज्राचार्यका अनुसार सत्तलको लम्बाई ६९ फिट र चौडाई १३ फिट १० इञ्च छ । २ तले २ पाखे सत्तलका दुवै तला तला ९५४.२७ वर्गफिटका छन् । भुईँतलामा जान ३ कवलपछि ढोका छ । पहिलो तलामा जान पूर्वतर्फ बाहिरबाट काठको भर्याङ् राखिएको छ । भुईँतलाको उत्तर खण्डमा १० कवल पसल छन् । आर्किटेक्ट बज्राचार्यका अनुसार, भुईँतलाको पूर्वतर्फ महाङ्काल, कृष्ण र बुद्धको मूर्ति राखिएका छन् । भित्र दक्षिणपट्टिको गारोसँगै ११ वटा प्रस्तर थाम र तोरण राखिएका छन् । यसमा अन्नपूर्ण द्यःछेँका गुथियारहरुले दशैमा पूजा गर्ने गरेका छन् । त्यसैमा एउटा नास द्यः (नाटयेश्वर) को मूर्ति पनि छ । पहिलो तलाको पूर्वमा आगम कोठा छ । यसमा लुँपौ गुथिले पूजाआजा गर्ने गरेका छन् । बाँकी भाग खुला छ ।
असनबाट बालकुमारीतर्फ अन्नपूर्ण मन्दिरसँगै रहेको सत्तल इतःचपा हो । यो सत्रौँ शताव्दीभन्दा अगाडि नै निर्माण भएको संरचना मानिन्छ । नेपाल मण्डलबाट व्यापारका लागि भोट जाने व्यापारीहरुका लागि निर्माण गरिएको मानिन्छ । परदेशमा गएपछि रोगव्याध आउन सक्छ । फर्किनेवित्तिकै परिवारसँग भेट गर्नु हुँदैन । निश्चित अवधि घुलमिल गर्नुहुँदैन, भन्ने सामाजिक विश्वाश अनुसार लामो समय व्यापार गर्न गएकाहरुलाई निश्चित समय छुट्टै बस्न बनाइएको बासस्थान हो ।
भोट व्यापार गरेर फर्किएपछि घर जानुअघि १५ दिन यहाँ क्वारेन्टिन बस्नु पथ्र्यो । त्यसपछि भोटाहिटीमा नुहाएपछि मात्र घर जान पाइन्थ्यो । यसरी हेर्दा इतःचपा तत्कालीन समयमा सामाजिक चेतनाको विम्ब पनि हो । यो संरचना जीर्ण भएपछि प्रयोग विहिन थियो । यसको संरचनागत जोखिमले पैदलयात्रीहरुलाई समेत जोखिम थियो । यो अवस्थामा रहेको संरचनालाई पुनःनिर्माण गरेर अहिले मौलिक स्वरुपमा फर्काइएको छ ।
सत्तलको अगाडिपट्टि पसल कवल छन् । पछाडिपट्टि भजन गर्ने स्थान र नास द्यःछेँ रहेका छन् । संरचनाको इतिहास हेर्दा अभिलेखहरूमा सत्रौँ शताब्दीभन्दा अगाडि नै निर्माण भएको पाइएको छ ।
काठमाडौँको व्यस्त व्यापारिक केन्द्र असन बजारको यो संरचना प्राचीनता, मौलिकतासँगै कलाका दृष्टिले पनि महत्वपूर्ण छ । सत्तलका झ्याल, थाम, मेठ, बार्दली कलात्मक छन् । झिँगटीयुक्त छानोले सत्तलको सुन्दरता प्रदर्शन गरेको छ । आर्किटेक्ट गौरव श्रेष्ठका अनुसार करिब गणेश मन्दिर, नारायण मन्दिर र उमा महेश्वर मन्दिरको पुननिर्माण लागत करिब ८३ लाख रुपियाँ हो । यस्तै डवली करिब ४ लाख रुपियाँ लागतमा मर्मत भएको छ । कलश द्वारको लागत करिब ७ लाख २५ हजार रुपियाँ हो ।
काठमाडौँ । अर्थमन्त्री रामेश्वरप्रसाद खनालले देशले अपेक्षा गरेको आर्थिक उचाइ हासिल गर्न नसक्नुका कारणहरू गहिराइमा गएर मूल्यांकन गर्नुपर्ने आवश्यकता औँल्याएका छन्।
अर्थमन्त्री खनालले विगतका राजनीतिक अस्थिरता, नीति निरन्तरताको अभाव र विकास प्रक्रियामा देखिएका अवरोधलाई आर्थिक प्रगतिको प्रमुख अवरोधका रूपमा प्रस्तुत गरे।
नेपाल आर्थिक पत्रकार समाज (सेजन) को २९औँ वार्षिकोत्सव तथा अवार्ड वितरण समारोहलाई सम्बोधन गर्दै मन्त्री खनालले मुलुकमा राजनीतिक असन्तुष्टि जतिसुकै रूपले देखा परे पनि “जो कोहीले सिर्जना गरेको सम्पत्ति देशकै सम्पत्ति हो” भन्ने बुझाइ अब सबै तहमा फैलिनु आवश्यक रहेको बताए। उनका अनुसार, निजी क्षेत्र, उद्यमी र लगानीकर्ताले सिर्जना गरेका सम्भावना र पूँजीलाई राज्यले उत्साहजनक वातावरण प्रदान गर्न सकेमात्र अर्थतन्त्रले गति पाउनेछ।
“सूचना गलत भयो भने लगानी नै भाग्छ”: सञ्चारसँग सावधानीको आग्रह
बढ्दो प्रविधि प्रयोग र सूचनाको तीव्र प्रवाहका बीच मन्त्री खनालले सूचनाको आधिकारिकता र विश्वसनीयता अझै महत्वपूर्ण बन्दै गएको बताए।
उनले चेतावनीपूर्ण भाषामा भने: “गलत वा अप्रमाणित सूचना बाहिरिनासाथ अन्तर्राष्ट्रिय सम्बन्ध बिग्रन सक्छ, लगानी वातावरणमा प्रतिकूल असर पर्न सक्छ। सञ्चार माध्यमले जिम्मेवार भूमिका निर्वाह गर्नैपर्छ।”
उनका अनुसार, सही जानकारी र सकारात्मक सन्देशले निजी क्षेत्रमा विश्वास पैदा गराउँछ, लगानीकर्ताको मनोबल उठाउँछ र दीगो विकासका लागि आधार निर्माण गर्छ।
ठूला पूर्वाधारमा बजेट, पुँजी बजार सुधार र सेवा–सुविधा नियमनमा सरकार सक्रिय
मन्त्री खनालले सरकारले पछिल्ला महिनाहरूमा ठूला पूर्वाधार आयोजनालाई अघि बढाउन आवश्यक बजेट थपेको उल्लेख गरे।
साथै, पुँजी बजारका विद्यमान समस्या समाधान गर्ने तथा पूर्वविशिष्ट पदाधिकारीहरूको सेवा–सुविधालाई कानुनी ढाँचामा ल्याएर व्यवस्थित गर्ने प्रक्रिया जारी रहेको पनि उनले स्पष्ट पारे।
उनका अनुसार, आर्थिक आधारभूत क्षेत्रहरू बलियो नहुँदा दीर्घकालीन विकासको गति कमजोर हुन्छ, त्यसैले पूर्वाधार र पुँजी बजार दुवै क्षेत्रमा सुधारका लागि सरकारले प्राथमिकता दिएको छ।
सेजनको भूमिकाको प्रशंसा
अर्थतन्त्रले धेरै पटक भोगेका उतार–चढावको प्रसंग उठाउँदै मन्त्री खनालले सेजनले वर्षौँदेखि जिम्मेवार, तथ्याधारित र पेशेवर पत्रकारिता प्रवर्द्धन गर्दै आएको उल्लेख गर्दै धन्यवाद व्यक्त गरे ।
उनले आर्थिक पत्रकारिताले सही बहस, तथ्यको प्रसार र नीतिगत सुधारमा महत्वपूर्ण टेवा दिएको बताए।
काठमाडौँ । नेपाल चेम्बर अफ कमर्सका अध्यक्ष कमलेश कुमार अग्रवालले देशको सुस्त अर्थतन्त्रलाई पुनर्जीवित गर्न तथा निजी क्षेत्रको मनोबल उकास्न अब ढोका खोलेको मात्र होइन, सुरक्षाको स्पष्ट प्रत्याभूति भएको निर्भीक लगानी नीति आवश्यक रहेको बताएका छन् ।
नेपाल आर्थिक पत्रकार समाज (सेजन) को २९औँ वार्षिकोत्सव समारोहलाई सम्बोधन गर्दै उनले पछिल्ला वर्षहरूमा देशमा आएको आर्थिक निराशा, नीति अस्पष्टता र लगानीकर्तामा बढ्दो अविश्वासका कारण उद्यमी व्यवसायी निरन्तर दबाबमा परेको उल्लेख गरे ।
उनले भने, “लगानीमैत्री वातावरण निर्माणका लागि सुरक्षाको प्रत्याभूति नै पहिलो सर्त हो”- चाहे त्यो स्वदेशी लगानीकर्ताको भरोसा फर्काउने कुरा होस् वा विदेशी पूँजी आर्कषण गर्ने आधार निर्माण । अग्रवालले भने, “स्वदेशी उद्यमी वर्षौंदेखि जोखिम बहन गर्दै आएका छन्, तर अहिलेको अवस्थामा उनीहरूको मनोबल कमजोर भएको छ। सरकारले तत्काल लगानी प्रवर्द्धन र सुरक्षा प्रत्याभूति हुने नीतिगत संरचना बनाउनु अत्यावश्यक छ।”
विदेशी लगानी सुरक्षा जस्तै आन्तरिक लगानी सुरक्षा पनि आवश्यक
अध्यक्ष अग्रवालले दुईपक्षीय लगानी प्रवर्द्धन तथा सुरक्षा सम्झौताले (BIPPA) विदेशी लगानीकर्ता सुरक्षित भएको जस्तै देशभित्रका लगानीकर्तालाई पनि समान किसिमको नीतिगत सुरक्षा आवश्यक रहेको बताए। उनले भने, “आन्तरिक लगानीकर्तालाई उत्तिकै संरक्षण नदिएसम्म देशभित्र उत्पादन, रोजगारी र आर्थिक चक्रले गति लिन सक्दैन।”
अर्थतन्त्रलाइ थला परेको वर्षौंदेखिको प्रभाव
नेपालले करिब छ वर्षदेखि नै कोभिड-१९ को आघात र त्यसपछिको अर्थतन्त्र व्यवस्थापनमा देखिएको कमजोरीको मार खेपिरहेको बताउदै अग्रवालले भने, “अर्थतन्त्र अहिले पनि विगतकै शिथिलताको भारी बोकेर हिँडिरहेको छ । लगानी वातावरण कमजोर छ, रोजगारी सिर्जना न्यून छ, राजस्व संकलन चुनौतिपूर्ण छ र वित्तीय स्थिरता पनि जोखिमपूर्ण अवस्थामा पुगेको छ।”
अग्रवालले मुलुक प्रकृति, पुँजी, स्रोत र सम्भावनाले धनी हुँदाहुँदै पनि लगानीमैत्री नीतिको अभावले युवालाई रोजगारीको अवसर नपाएको उल्लेख गरे। “समृद्ध राष्ट्रको सपना हेर्ने देशमा युवालाई सुरक्षित रोजगारी नदिनु विडम्बना हो,” उनले भने।
एक लाख ५० हजार उद्यमी कर्जा कालोसूचीमा
अध्यक्ष अग्रवालले विगतका संकुचित, अव्यवहारिक र व्यवसाय नबुझ्ने मौद्रिक नीतिका कारण पछिल्लो चार वर्षमा १ लाख ५० हजारभन्दा बढी उद्यमी व्यवसायी कर्जा कालोसूचीमा पर्ने अवस्थासम्म पुगेको गम्भीर तथ्य प्रस्तुत गरे। उनका अनुसार, अर्थतन्त्रको मेरुदण्ड मानिएको निजी क्षेत्रमा यस्तो ठूलो चोट पुग्नु देशकै आर्थिक स्वास्थ्यका लागि चिन्ताजनक संकेत हो।
चालु पूँजी कर्जा निर्देशिका खारेज गर्न माग
अर्थतन्त्रलाई सुस्त पारिरहेको अर्को कारणका रूपमा उनले नेपाल राष्ट्र बैंकले जारी गरेको चालु पूँजी कर्जा निर्देशिकालाई उल्लेख गरे।
उनले स्पष्ट भने, “दीर्घ समयदेखि शिथिल अर्थचक्रले थिचिएका उद्यमीलाई राहत दिन हो भने यो निर्देशिका तत्काल खारेज गर्नैपर्छ। व्यवसायलाई श्वास फेर्न दिने वातावरण सिर्जना नगरी अर्थतन्त्र उठ्दैन।”
निजी क्षेत्रले चाहेको अब एकै कुरा- स्पष्टता, सुरक्षा र स्थिरता
समारोहमा उनले निजी क्षेत्रले अब नारा, भाषण वा आश्वासन होइन कार्यन्वयनयोग्य नीति खोजेको बताए। उनका अनुसार, लगानी सुरक्षा, स्थिरता, सरकारी प्रतिबद्धता र वित्तीय नीतिमा सहजता देखिए मात्र निजी क्षेत्र पुनः सक्रिय भएर अर्थतन्त्र चलाउन अग्रसर हुनेछ।
काठमाडौं । नेपाली कांग्रेसको वर्तमान केन्द्रीय कार्यसमितिको म्याद माघ मसान्तसम्म थप्ने निर्णय गरेको छ ।
सोमबार बसेको केन्द्रीय कार्यसमितिको बैठकले शेरबहादुर देउवा नेतृत्वको कार्यसमितिको म्याद माघ मसान्तसम्मलाई थप्ने निर्णय गरेको प्रवक्ता डा. प्रकाश शरण महत्तले जानकारी दिएका छन् ।
आजको बैठकले पुस २६ देखि २८ सम्म महाधिवेशन गर्ने निर्णय गरेसँगै एक महिनाको ग्रेस पिरियड राखेर केन्द्रीय समितिको म्याद माघ मसान्तसम्म थपिएको प्रवक्ता महत्तले जानकारी दिएका हुन् । काँग्रेसको वर्तमान कार्यसमितिको म्याद मंसिर २३ गते सकिदैछ ।
काठमाडौँ । नेपाली काँग्रेसले पुसमा नियमित महाधिवेशन गर्ने निर्णय गरेको छ ।
सोमबार बसेको केन्द्रिय समितिको बैठकले पार्टीको १५औ महाधिवेशन आगामी पुस २६ देखि २८ सम्म गर्ने निर्णय गरेको प्रवक्ता डा. प्रकाश शरण महत्तले जानकारी दिएका छन् ।
मङ्सिर २० गतेसम्म नयाँ क्रियाशील सदस्य वितरण गरिसक्ने र पुस ८ गते भित्र सबै निर्वाचन क्षेत्रमा नयाँ क्रियाशील सदस्यताको काम सक्ने र पुस १४ गते क्रियाशीलको सूची केन्द्रीय कार्यालयमा बुझाउने मिति तय भएको प्रवक्ता महत्तले जानकारी दिए ।
महाधिवेशन बारेको विवादका कारण असोज २८ देखि जारी काँग्रेसको केन्द्रीय समितिको बैठक पटक पटक बैठक सरिरहेको थियो ।
काठमाडौँ । नेपाल लाइफ इन्स्योरेन्स कम्पनी लिमिटेडले नेपाल सरकारद्वारा स्थापना गरिएको भौतिक पूर्वाधार पुर्ननिर्माण कोषमा १ करोड ५० लाखको सहयोग प्रदान गरेको छ ।
सोमबार अर्थ मन्त्रालयमा आयोजित एक विशेष समारोहबीच कम्पनिका संचालक समितिका अध्यक्ष गोविन्द लाल संघई, संचालक कमलेश कुमार अग्रवाल र कम्पनीका प्रमुख कार्यकारी अधिकृत प्रवीण रमण पराजुलीले संयुक्त रूपमा एक करोड पचास लाख रुपैयाँको चेक माननीय अर्थमन्त्री रामेश्वर खनाललाई हस्तान्तरण गरेका हुन् ।
गत भाद्र २३ र २४ गते भएको जेनजी प्रदर्शन र आन्दोलनको क्रममा देश भरीका सार्वजनिक भौतिक संरचनामा भएको क्षतिको पुर्ननिर्माण, आर्थिक पुनरुत्थान तथा राहत लगायत कार्यको लागि नेपाल लाइफ इन्स्योरेन्स कम्पनी लिमिटेडले भौतिक पूर्वाधार पुर्ननिर्माण कोषमा १ करोड ५० लाख रुपैयाँ सहयोग प्रदान गरेको हो । कम्पनीले आफ्नो संस्थागत सामाजिक उत्तरदायित्व अन्तर्गत उक्त सहयोग रकम उपलब्ध गराएको हो ।
उक्त हस्तान्तरण समारोह समारोहमा बोल्दै यस कम्पनीका सञ्चालक समितिका अध्यक्ष संघईले नेपाल लाइफले संस्थागत सामाजिक उत्तरदायित्व कार्यक्रम अन्तर्गत विभिन्न कार्यक्रमहरू सञ्चालन गर्दै आएको बताए । जेनजी प्रदर्शन र आन्दोलनको क्रममा सार्वजनिक भौतिक संरचनामा ठूलो क्षति पुगेको र यसको पुननिर्माणमा सहयोग गर्न पाउँदा आफू हर्षित भएको बताए । आगामी दिनहरूमा पनि यस किसिमको सहयोग प्रदान गर्न कम्पनी तत्पर रहेको प्रतिबद्धता समेत व्यक्त गरे ।
नेपाल सरकारले आर्थिक सामाजिक भौतिक रूपान्तरणका लागि सञ्चालनमा ल्याउने विभिन्न कार्यक्रमहरुमा सहयोग गर्न कम्पनी तत्पर रहेको र त्यसका निम्ति पहल गर्दिनका निम्ति समेत आग्रह गरे ।
अर्थमन्त्री रामेश्वर प्रसाद खनालले नेपाल लाइफले प्रदान गरेको सहयोगका निम्ति धन्यवाद ज्ञापन गरेका थिए । नेपालको पूर्वाधार विकासमा यस किसिमको सहयोग टेवा पुर्याउने र आगामी दिनमा पनि यस प्रकारको सहयोगको अपेक्षा रहेको बताए ।